Nagip Arifi ka marrë edhe zyrtarisht detyrën e kryetarit të komunës së Bujanocit.

Ai në konferencën për media tha  se ishte një akt solemn i pranim-dorëzimit të detyrës nga ish kryetari i komunës, Shaip Kamberi dhe ka marrë dokumentin për gjendjen financiare që sipas tij është katastrofale.

“Që nga viti 2020 kur kanë ardhur shqiptarët në pushtet gjendja e komunës është për tu vajtuar dhe vetëm sot komuna është në bllokadë 4.554 mijë dinarë”, theksoi Arifi, shkruan Titulli.com.

Ai tha se punëtorët e administratës komunale që nga nesër do të duhet të fillojnë punën nga ora 7 e mëngjesit dhe se bashkëpunim me shefin e administratës do të punojnë në përmirësimin e gjendjes.

“Dita e parë, mandati i katërt, kryetar i zgjedhur nga 25 këshilltarë që përfaqësojnë rreth 13.000 votues shqiptarë”, shkroi Arifi në profilin e tij në facebook menjëherë pas marrjes së detyrës në zyrën e kryetarit.

Nagip Arifi është zgjedhur kryetar i komunës së Bujanocit me një koalicion të partive politike shqiptare PD-PVD-LPD dhe APN, të cilët në zgjedhjet lokale më 21 qershor fituan së bashku 25 këshilltarë në kuvendin komunal prej 41 sa ka gjithsejtë.