Nënkryetari i LDK-së dhe kryetari i Pejës, Gazmend Muhaxheri ka thënë se Qeveria Hoti do të jetë e suksesshme edhe për shkak të “kumbarës” së fortë.

Muhaxheri në RTV Dukagjini ka thënë se Qeveria Hoti e ka një “nënë” shumë të fortë e që nuk është Hashim Thaçi.

“Qeveria Hoti e ka “momën” e fortë shumë. Zoti Hoti e ka mbështetjen shumë më të fuqishme se që e ka Presidenti Thaçi. Hoti e ka mbështetjen e atij që e mundësoi krijimin e shtetit të Kosovës. Prandaj kjo qeveri do të jetë qeveri që i jep perspektivë këtij vendi”, tha ai, përcjell Telegrafi.

Nënkryetari i LDK-së thotë se Hoti do të jetë kryeministër i suksesshëm qysh prej fillimit për shkak të ndërmjetësuesve të fuqishëm duke aluduar në Shtetet e Bashkuara të Amerikës.

“Dita e mirë shihet qysh në mëngjes. Kjo gjë po shihet edhe me menaxhimin e pandemisë në ditët e para dhe planin ekonomik”.

Duke folur për koalicionet Muhaxheri ka thënë se është koha të largohen vijat e kuqe.

“Me këtë logjikë si po veprohet sot, as Presidenti Rugova nuk do të kishte ndërtuar koalicione”.

Ai ka shtuar më tej se nëse dikush do të ishte dashur të nxjerrë probleme për koalicion do të ishin deputetët e LDK-së nga Peja për shkak të përplasjeve lokale që kanë pasur.