Ministri i Shëndetësisë, Armend Zemaj, ka mbajtur konferencë për medie në të cilën ka shpalosur manualin për mbrojtje nga përhapja e virusit, raporton Front Online.

“Po e ndajmë me ju manualin për mbrojtje nga virusi. Është një dokument i cili do të përditësohet, varësisht nga situata dhe do të plotësohet bazuar në të dhënat e reja shkencore”, ka thënë Zemaj në një konferencë për shtyp.

Manuali përmban material nga profesionistët shëndetësorë dhe nga OBSh-ja.

Zemaj ka thënë se ky manual përmban udhëzime për udhëtime, gastronomi dhe veprimtaritë e tjera.

“Ky është përgatitur në bazë të njohurive dhe duke shfrytëzuar njohuritë e organizatave. Do të parandalojë përhapjen e virusit kurse përmban udhëzime për udhëtime, gastronomi, vendvotimet, qendrat tregtare dhe veprimtaritë që po lirojmë”, ka thënë Zemaj.

Ministri ka kërkuar zbatimin e këtij manuali.

“Përdorni dhe zbatoni manualin, përdorni maskat, mbani distancën dhe mbani higjienën. Këto janë armë të thjeshta por shpëtojnë jetë dhe na ndihmojnë të kthehemi në normalitet”, tha ai.

Ministria e Shëndetësisë do ta shpërndajë manualin në të gjitha institucionet qendrore e lokale. /Front Online/

https://www.facebook.com/FrontOnlineMedia/videos/264540351468152/?v=264540351468152&notif_id=1592219340678766&notif_t=live_video