Ministri i Jashtëm gjerman Heiko Maas deklaroi se nuk sheh asnjë mundësi që Rusia të kthehet shpejt në G7, pasi presidenti amerikan, Donald Trump ngriti mundësinë e ripranimit të Moskës në grupin e vendeve të industrializuara.

Arsyet për pengimin e Rusisë ishin aneksimi i Krimesë dhe ndërhyrja në Ukrainën Lindore.

“Për sa kohë që ne nuk kemi një zgjidhje atje, unë nuk shoh një shans për kthimin e Rusisë”, thotë Maas në një intervistë, që u botua sot në gazetat ”Rheinische Post” dhe ”Bonner General-Anzeiger”.

Trump ka propozuar një zgjerim të grupit G7 dhe tha se ai dëshironte të ftonte Australinë, Indinë, Rusinë dhe Korenë e Jugut në takimin e ardhshëm, të cilin ai planifikon ta mirëpresë në shtator, pasi ai u shty për shkak të pandemisë së koronavirusit.

“Vetë Rusia mund të japë kontributin më të madh në hapjen e dyerve të tilla”, tha Maas.

“G7-a dhe G20-a janë dy formate të koordinuara ndjeshëm. Ne nuk kemi nevojë për një G11 ose G12”, shtoi ai.

Anëtarët e G7 janë Britania e Madhe, Kanadaja, Franca, Gjermania, Italia, Japonia dhe SHBA.

Maas vuri në dukje se marrëdhëniet me Rusinë janë të vështira në shumë fusha.

“Por, ne gjithashtu e dimë se ne kemi nevojë për Rusinë për të zgjidhur konflikte të tilla si ato në Siri, Libi dhe Ukrainë”, shtoi Maas.