Jo veç Gjermania, Zvicra e Austria.
Për kosovarët, që zgjedhin jetesën jashtë vatanit shkaku i kushteve më të mira, vend i lakmuar është bërë tash edhe Kroacia.
Veç në vitin 2019 në këtë shtet kanë shkuar 3525 kosovarë.
Sociologut, Bekim Selishta, kjo shifër po i duket goxha e lartë, derisa mungesën e perspektives në vend, ky, e sheh si shkaktar kryesor të migrimit të kosovarëve.
“Për një vit me shku 3500 numri është shumë i madh, edhe pse te ardhurat atje nuk janë shumë të larta. Kjo po ndodh të familjet e reja. Perspektiva është më e vogël tek ne. Nëse lind fëmijë, rrogat nuk janë të mjaftueshme me punu veç njëri prind. Shëndetësia, në anën tjetër, nuk është nivelin e duhur”, u shpreh Selishta për Front Online.
Ikjet nga Kosova për në Kroaci nuk janë ndalur as në 2020-n.
Ndonëse nuk ka të dhëna zyrtare akoma, portali Front Online në fillim të këtij viti kishte raportuar për dhjetëra kosovarë që ia mësynin kufijëve të shtetit kroat.
Madje kërkesat ishin aq të mëdha, saqë kompanitë, kishin lëshuar linja të rregullta katër herë në javë për shkuarjen atje.
Shtetin e tyre për Kroacinë e ka lënë një numër i konsiderueshem edhe i boshnjakëve dhe serbëve.
Përgjatë 2019-s, në Byron e Statistikave të Kroacisë figurojnë mbi 12.040 njerëz që kanë emigruar nga Bosnja dhe Hercegovina në Kroaci, derisa 4.079 sosh nga Serbia.
Nuk dihet nëse ky trend ka vazhduar edhe në vitin 2020, meqë të dhënat për këtë vit mungojnë ende.
E që Kosova të mos vie para një situate të atillë, sa t`i kalojë këto dy shtete për nga numri i emigrantëve, Selishta, thotë se institutcionet kosovare duhet të bëjnë më shumë.
“Duhet t`i përkrah, duhet t`i kushton rëndësi familjeve të reja, që ato të rrinë në vendin e vet. Duhet t`i motivojë edhe profesionistët. Ka stimulime të ndryshme. Nëse i ndihmon nënave dhe fëmijëve që kanë ekonomi të dobët ky është një lehtësim i madh”, deklaroi Selishta për Front Online.
Me fluks të ikjes së qytetarëve, Kosova, është përballur edhe më herët.
Vetëm në vitin 2015, 75 mijë qytetarë, e patën lëshuar vendin në kërkim të një jete më të mirë në vendet e Bashkimit Evropian.
