Sirianët kanë dalë të dielën në vendvotime në rajonet e kontrolluara nga forcat qeveritare në vendin e shkatërruar nga lufta, i cili të dielën ka mbajtur zgjedhjet parlamentare në kulmin e masave kufizuese kundër përhapjes së koronavirusit.
Presidenti Bashar al-Assad, dhe bashkëshortja e tij, Asma, me maska në fytyrë, kanë votuar në Damask në mëngjes në objektin e Ministrisë së Çështjeve Presidenciale. Është hera e tretë që Siria po mban zgjedhje prejse shpërtheu lufta në marsin e vitit 2011.
Konflikti ka marrë jetën e më shumë se 400 mijë sirianëve, duke zhvendosur pothuajse gjysmën e popullatës së Sirisë. Më shumë se pesë milionë refugjatë sirianë ndodhen në vendet fqinje.
Zgjedhjet e sivjetme parlamentare mbahen pas një vale të re sanksionesh amerikane që janë jetësuar muajin e kaluar dhe një fushate për luftimin e korrupsionit me kushëririn e Assadit nën presion për t’ia kthyer dhjetëra miliona dollarë shtetit. 1.658 kandidatë garojnë me aprovim të Qeverisë për deputet në parlamentin me 250 ulëse.
