Në kuadër të masave kundër pandemisë Covid-19, Ministria e Shëndetësisë në fazën e tretë të hapjes nga data 1 qershor ka lejuar veprimtarinë e pothuajse të gjitha bizneseve dhe institucioneve përveç shkollave.

MSH pati paralajmëruar se hapja nënkupton më shumë përgjegjësi kolektive dhe në bazë të situatës epidemiologjike, masat dhe kufizimet do të rikthehen sërish.

Këto janë rekomandimet e IKSHPK-së për mbrojtje nga Covid-19:

Në bazë të rekomandimeve të Institutit Kombëtar të Shëndetit Publik, MSH e ka bërë të obligueshme bartjen e maskave në vendet e mbyllura kur ka shumë njerëz, sikurse është transporti publik, qendrat tregtare, etj. Ndërsa rekomandohet mbajtja e distancës në vendet ku është e mundur, si dhe të vazhdohet pastrimi i duarve sikurse është rekomanduar edhe më parë.

Edhe Organizata Botërore e Shëndetësisë e ka bërë të obligueshme mbajtjen e maskave në hapësira të mbyllura ku ka shumë njerëz për shkak se virusi Covid-19 mund të transmetohet përmes spërklave të njerëzve të infektuar. Shumica e personave të sëmurë me koronavirus nuk shfaqin simptoma në ditët e para dhe mund të infektojnë më shumë njerëz duke mos e ditur fare.