Gjatë 24 orëve të kaluara, në Iran u regjistruan 3,341 raste të reja të koronavirusit. Kjo është shifra më e lartë që nga fillimi i qershorit.

Lajmin e bëri të ditur zëdhënësja e Ministrisë së Shëndetësisë, Sima Sadat, e cila gjithashtu bëri të ditur se numri i përgjithshëm i personave të prekur nga Covid-19 ka shkuar në 425,481.

Përpos infektimeve, gjatë kësaj periudhe u regjistruan edhe 177 viktima të reja dhe shifra e përgjithshme e të vdekurve nga pandemia në Republikën Islamike shkoi në 24,478, shkruan The Guardian.

Zëvendësministri iranian i Shëndetësisë, Iraj Harirchi, tha javën e kaluar se i tërë vendi është në zonën e kuqe të paralajmërimit për shkak të rritjes alarmante të numrit të vdekjeve dhe infektimeve.

Zyrtarët e shëndetësisë kanë paralajmëruar për një valë të tretë të pandemisë, ndërsa qeveria ka thënë se rritja e numrit të rasteve ka ardhur pjesërisht si pasojë e rënies së nivelit të respektimit të protokolleve shëndetësore.