Kryeministri Hoti së bashku me ministrin Besian Mustafa kanë takuar drejtuesit e Shoqatës së Prodhuesve të Verërave në Kosovë “Enologjia”,transmeton Front Online.

Në këtë takim Hoti shprehi përkrahjen e këtij sektori,duke përmendur kështu dyfishmin e subvencioneve që do të ndikojë edhe në përmirësimin e situatës në këtë sektor.

Hoti tha se do të rritet  çmimi për litër të verës,nga 4 centë për litër të prodhuar të verës në 8 centë, dhe nga 1 mijë euro për hektar në vreshtari në dy 2 mijë euro.

Komunikata e plotë

Kryeministri Hoti priti drejtuesit e Shoqatës së Prodhuesve të Verërave “Enologjia”

Prishtinë, 1 tetor 2020

Kryeministri i Qeverisë së Republikës së Kosovës, Avdullah Hoti, i shoqëruar nga ministri i Bujqësisë, Pylltarisë dhe Zhvillimit Rural, Besian Mustafa, priti drejtuesit e Shoqatës së Prodhuesve të Verërave në Kosovë “Enologjia”, me të cilët diskutoi për gjendjen në këtë sektor, si dhe rolin mbështetës të institucioneve, kryesisht përballë situatës së krijuar nga pandemia COVID-19.

Me këtë rast, kryeministri Hoti shprehu përkushtimin e Qeverisë për të qenë afër këtij sektori dhe të tjerëve, me qëllim të arritjes së normalitetit ekonomik, ku theks të veçantë i dha dyfishimit të subvencioneve, si: nga 4 centë për litër të prodhuar të verës në 8 centë, dhe nga 1 mijë euro për hektar në vreshtari në dy 2 mijë euro.

“Tani më i kemi aktive gjashtëdhjetë milionë euro (60,000,000 €) në funksion të rimëkëmbjes ekonomike, më konkretisht për subvencionim të bizneseve, të cilat do të shpërndahen deri në fund të vitit, ndërsa për sektorin e bujqësisë i kemi dyfishuar subvencionet”, tha ndër të tjera kryeministri Hoti.

Nga ana e tyre, drejtuesit e Shoqatës së Prodhuesve të Verërave në Kosovë “Enologjia”, e vlerësuan lart rolin mbështetës të kryeministrit Hoti, që për qëllim parësor ka arritjen e normaliteti ekonomik.