Qeveria gjermane ka ndarë një miliard euro shtesë nga buxheti për vitin 2023 për ta përkrahur Ukrainën kundër sulmeve kibernetike të Rusisë dhe për grumbullimin e dëshmive për krime të luftës, thuhet në një dokument.
Ndarja e re e mjeteve bëhet në kohën e debatit për atë nëse Gjermania duhet ta shtojë dërgimin e ndihmave ushtarake në Ukrainë. Vendi i përfshirë nga lufta ka thënë se ka nevojë për armë sulmuese të fushëbetejës, përfshirë tanket, raporton agjencia “Reuters”.
Gjermania është dhuruesja e tretë më e madhe ushtarake për Ukrainën, edhe pse qëndron shumë prapa Shteteve të Bashkuara, armët e të cilave kanë qenë jetike për sukseset e ushtrisë ukrainase në fushat e betejës, që e arritën kulmin me rimarrjen nën kontroll të qytetit Kherson, vendbanimi më i madh ukrainas që kishte rënë në duart e rusëve.
Një pjesë e mjeteve do të ndahet për ekipet që grumbullojnë dëshmi për shkeljen e të drejtave të njeriut dhe krimet e luftës, përfshirë ato që nuk janë mbuluar pas tërheqjeve të Rusisë.
Fonde të posaçme do të dhurohen edhe për përkrahjen e shoqërisë civile në rajon, përfshirë mbrojtjen e gazetarëve në Bjellorusi, Rusi dhe Ukrainë.