Ministria e Shëndetësisë e Gjermanisë ka vendosur të ofrojë teste falas për koronavirus për udhëtarët që kthehen në të gjitha aeroportet gjermane, në përpjekje për ta parandaluar rritjen e numrit të rasteve për shkak të udhëtimeve gjatë verës.

Sipas ministres rajonale të Shëndetësisë në Berlin, Dilek Kalayci, testimi fillimisht nuk do të jetë i obligueshëm dhe shteti do t’i mbulojë shpenzimet për të gjitha rastet, raporton “Schengenvisainfo”.

Ata që kthehen nga vendet me rrezikshmëri të lartë duhet të testohen dhe ata që kthehen nga vendet pa rrezik gjithashtu do ta kenë mundësinë”, theksoi zonja Kalayci.

Ajo shtoi se personat që kthehen nga vendet pa rrezik nuk do të testohen në aeroporte, por do të marrin test falas nga autoritetet shëndetësore lokale.

Qendrat e testimit do të vendosen në të gjitha aeroportet në mënyrë që personat e kthyer nga vendet me rrezikshmëri të lartë të testohen menjëherë pas ardhjes.

Personat që nuk dëshirojnë të testohen ose ata që dalin pozitivë në testin për koronavirus do të jenë të detyruar të qëndrojnë në karantinë për 14 ditë.

Aeroportet në Frankfurt, Këln dhe Mynhen tashmë janë duke e zbatuar këtë skemë, ndërsa Berlini planifikon që t’i nisë testimet në aeroporte nga kjo javë, njoftuan autoritetet lokale.