Lajme

Ekspertët e integrimeve: Sivjet vendimi, vitin tjetër lëvizja e lirë për kosovarët në BE

Ekspertët e integrimeve: Sivjet vendimi, vitin tjetër lëvizja e lirë për kosovarët në BE
18:42 | 01 Korrik 2020

Gjermania mori sot kryesimin e Këshillit të Bashkimit Evropian duke ngjallur shpresa të reja te populli i Kosovës rreth liberalizimit të vizave.

Ky proces ka ngecur pavarësisht se autoritetet në Kosovë janë të sigurtë se kanë përmbushur të gjitha kriteret e kërkuara nga institucionet evropiane.

E, në lidhje me atë se a do të bëhet liberalizimi i vizave gjatë kryesimit të BE-së nga Gjermania, për Front Online, kanë folur njohësit e çështjeve të integrimeve evropiane.

Ata janë shprehur optimist se pas marrjes së kryesisë së BE-së nga Gjermania, do të ketë lëvizje pozitive për çështjen e liberalizimit të vizave për Kosovën, por para së gjithash institucionet duhet të kenë progres në dialogun me Serbinë dhe sundimin e ligjit.

Shasha: Dialogu me Serbinë dhe sundimi i ligjit – kushtet që duhet t’i plotësoj Kosova

Demush Shasha, drejtor ekzekutiv në Institutin “EPIK”, tha se gjasat janë reale që liberalizimi i vizave për Kosovën të ndodh gjatë kohës sa Gjermania do të jetë kryesuese e BE-së.

“Tani, në gjithë këtë kontekst, gjatë Presidencës Gjermane të Këshillit të BE-së ekzistojnë gjasat reale për të siguruar përfundimin e procesit vendimmarrës brenda institucioneve të BE-së për liberalizimin e vizave. Kjo pasi që Gjermania tani më është deklaruar në favor të liberalizimit të vizave për Kosovën dhe pasi që Gjermani në cilësinë ë Presidencës së BE-së do përfaqësoj vendin më të fuqishëm të BE-së i cili do të jetë në gjendje të influencoj agjendën vendimmarrëse të BE-së”, tha ai për Front Online.

Ai tha se procesi i liberalizimit të vizave varet nga Kosova, nëse i plotëson dy kushtet kryesore siç janë, progresi në dialogun ndërmjet Kosovës dhe Serbisë dhe progres në sundimin e ligjit.

“Sidoqoftë, çdo gjë do varet nga ne. Fillimisht, Kosova duhet të përfundoj detyrat e shtëpisë dhe në këtë drejtim duhet të shënohet progres në dy aspekte: (1) progres në dialogun për normalizimin e marrëdhënieve mes Kosovës dhe Serbisë, dhe (2) progres në fushën e sundimit të ligjit, me theks të veçantë në arritjen e rezultateve bindëse në luftimin e korrupsionit të nivelit të lartë dhe krimit të organizuar”, deklaroi ai.

Ditë më parë, kancelaria, Angela Merkel, ka marrë një letër nga 33 deputetë të Parlamentit Evropian ku kanë kërkuar që të liberalizohen vizat për Kosovë. E, lidhur me këtë, Shasha tha se ky është një hap pozitiv për liberalizimin e vizave për Kosovën, pasi që siç tha ai, e ri-konfirmon përkrahjen që PE-ja e ka për këtë proces që liberalizimi të ndodh gjatë presidencës së Gjermanisë.

“Konsideroj është hap shumë i mirëseardhur pasi që letra është ri-konfirmim i përkrahjes së madhe që çështja e liberalizimit të vizave për Kosovën gëzon në kuadër të Parlamentit Evropian. Letra është nënshkruar nga 33 anëtarët e Parlamentit Evropian nga 4 grupe më të mëdha parlamentare të Parlamentit Evropian. Letra është shprehje e fuqishme e vullnetit të Parlamentit Evropian që liberalizimi i vizave për Kosovën të përfundoj gjatë Presidencës Gjermane të Këshillit të BE-së”, tha ai për Front Online.

Në rast se bëhet liberalizimi i vizave për Kosovën, gjatë kohës sa Gjermania është Kryesuese e BE-së, qytetarët mund të lëvizin pa viza gjatë vitit 2021. Këtë e ka thënë për Front Online, drejtori ekzekutiv i Institutit “Epik”, Demush Shaha.

“Mund të kolaudojmë se skenari më optimist i mundshëm për liberalizimin e vizave mbetet që deri në fund të vitit të sigurohet përfundimi i procesit të vendimmarrjes brenda institucioneve të BE-së nën Presidencën e Gjermane të BE-së, ndërsa lëvizja e lirë e qytetarëve të sigurohet gjatë vitit 2021”, tha ai.

Emini: Gjasat janë që në shtator të merret vendimi për liberalizimin e vizave

Ndërsa, Donika Emini, drejtoreshë në CiviKos, tha se pret që gjatë kryesimit të BE-së, nga Gjermania të ketë lëvizje pozitive për liberalizimin e vizave për Kosovën, pasi që siç tha ajo, rol të madh tani luan edhe përfshirja e Francës në dialog me Serbinë përmes Samitit të Parisit.

“Gjermania do ta ketë në agjendë për shkak se e para është njëra ndër vendet më të mëdha që ka qenë më pak skeptike në raport me Kosovën apo më pak skeptike se Franca edhe besoj se së bashku me Francën sidomos pas angazhimit të Francës në dialogun Kosovë- Serbi përmes Samitit të Parisit do të ketë lëvizje pozitive, kjo është pritshmëria më e madhe”, tha ajo për Front Online.

Emini tha se letra të cilën deputetët e PE-së, ia dërguan Merkelit për liberalizimin e vizave për Kosovës është një hap pozitiv, pasi që siç tha ajo, i jep mbështetje kancelares për këtë proces.

“Eurodeputetët çdo herë kanë qenë pro liberalizimit të vizave për Kosovën edhe në Parlament është votuar pro, normalisht se është një hap pozitiv i cili duhet të përshëndetet dhe këtë e ka bërë edhe raportuesja për Kosovën e cila e ka marrë këtë çështje me seriozitet, normalisht që kjo i jep edhe një shtytje kancelares për të vazhduar me këtë proces”, u shpreh ajo për Front Online.
Në shtator të këtij vitit, pritet që të mblidhet Këshilli i Bashkimit Evropian, Emini tha se për Kosovën është me rëndësi që në këtë takim të merret vendim pozitiv për çështjen e liberalizimit të vizave.

“Normalisht kishte me qenë mirë se në takimin e ardhshëm të Këshillit në shtator të votohet çështja e liberalizimit të vizave për Kosovën e pastaj të ketë një periudhë kohore prej 6 deri 1 vit për ta fuqizuar atë vendim. Për ne është me rëndësi që të merret vendimi pozitiv në nivel të Këshillit pastaj ajo pritje është teknike e cila nuk mund të përbej probleme teknike”, tha ajo për Front Online.

Gjatë ditës, edhe Ambasadori i Gjermanisë në Kosovë, Christian Heldt, ka thënë se shpreson që shumë shpejt do të merret vendimi për liberalizimin e vizave ndaj kosovarëve.

Sipas tij, kjo do të bëhet jo për shkak të politikanëve por si shpërblim për njerëzit e heshtur e punëtorë të Kosovës, si dhe studentët që duan të arrijnë diçka.

Në adresimin e tij online, me rastin e marrjes së Presidencën së Bashkimit Evropian nga Gjermania, Hledt është treguar i ashpër me ata që sipas tij, bëjnë zhurmë e thonë se Evropa nuk qenka me Kosovën, por dikush tjetër.

Ai ka thënë se gjermanët i kanë nën llupë zhvillimet politike dhe në luftimin e krimit të organizuar e korrupsionit dhe se presin rezultate konkrete të zhvillimit ekonomik sepse siç tha Heldt, Evropa s’ka lisa që çelin para.

Kryesimin e BE-së, Gjermania e mori nga Kroacia.

Gjatë kohës sa Kroacia, ishte në këtë pozitë nuk pati ndonjë lëvizje pozitive për çështjen e liberalizimit të vizave për Kosovën. /Front Online/

Tri temat e mëdha të Gjermanisë për Kosovën, përmenden edhe vizat

Blini derivate me çmim të lirë dhe hyni në garë për të fituar banesë, iphone 13 e 19 shpërblime tjera

Të tjera