Katër vëllezërit Demaj të cilat janë të dënuar në rastin “Drenica 2” me tri vjet burgim kanë bërë thirrje që me rastin e tyre të merret Gjykata Speciale.

Kërkesën ata e bënë përmes një letre, e cila është përcjellë për klankosova.tv me anë të familjarëve.

Në letër theksojnë se po mbahen padrejtësisht në burg dhe se rasti i tyre është një fabrikim “për t’i eliminuar si familje”.

“Tash e sa vite po mbahemi padrejtësisht në burg ne 4 djemtë e Familjes Demaj, që lirinë për të cilën luftuam deri në ditën e fundit me qëllimin e vullnetin më të madh për çlirimin e vendit tonë, sot nuk po mundemi ta gëzojmë për shkak të fabrikimeve që po na bëhen në emër të drejtësisë, duke na bërë padrejtësi”, thuhet në letër.

“Ne vëllezërit Demaj, të njohur si rasti “Drenica 2”, kërkojmë që gjykimin e rastit tonë ta marrë Gjykata Speciale që ndodhet në Hagë për ta dëshmuar njëherë e mirë pafajësinë tonë dhe krimin që kanë bërë tërë këto vite mbi neve duke na mbajtur padrejtësisht në burg”.

Gjykata Supreme e Kosovës në vitin 2017 pati refuzuar të gjitha kërkesat për mbrojtje të ligjshmërisë të paraqitur në rastin “Drenica2”.

Letra e plotë:

JO 12 VITE POR EDHE 100 VITE NËSE ËSHTË NEVOJA DO T’I MBANIM POQËSE NA KËRKON VENDI YNË, POR NUK DUROJMË TË MBAHEMI PA FAJ PËR KRIMET QË NUK I KEMI BËRË

Tash e sa vite po mbahemi padrejtësisht në burg ne 4 djemtë e Familjes Demaj, që lirinë për të cilën luftuam deri në ditën e fundit me qëllimin e vullnetin më të madh për çlirimin e vendit tonë, sot nuk po mundemi ta gëzojmë për shkak të fabrikimeve që po na bëhen në emër të drejtësisë, duke na bërë padrejtësi.

Përderisa tërë këto vite shteti ynë nuk ka lënë askujt pa i ndihmuar për çdo gjë, neve që kontribuuam për lirinë e këtij vendi, nuk u munduan as të na ndihmojmë ta zbardhim të vërtetën e këtij rasti, duke na anashkaluar shokët tanë të luftës e duke na lënë në harresë edhe për gjërat më elementare që i duhen familjeve tona në kohën kur ne mbahemi padrejtësisht në burg.

Rasti ynë ka shumë gjëra të dyshimta që kanë ndodhur duke na bërë të dyshojmë që ishte kryekëput një fabrikim i tmerrshëm për të na eliminuar tërësisht si familje.

Duam të sqarojmë edhe tek ndërlidhja që po na bëhet e rastit tonë me një plagosje me armë zjarri që kishte ndodhur në vitin e largët 1991, që ishin të përfshirë kushërinjtë tanë e që ne familja jonë asnjëherë nuk kemi pasur asgjë të keqe me asnjërën palë, e kjo është shumë lehtë e verifikueshme për secilin që dëshiron të dijë të vërtetën dhe jo ta ndërlidhin me rastin tonë pa kurrfarë lidhje.

Ne vëllezërit Demaj, të njohur si rasti “Drenica 2”, kërkojmë që gjykimin e rastit tonë ta marrë Gjykata Speciale që ndodhet në Hagë për ta dëshmuar njëherë e mirë pafajësinë tonë dhe krimin që kanë bërë tërë këto vite mbi neve duke na mbajtur padrejtësisht në burg.

I bëjmë thirrje përfaqësuesve të Gjykatës Speciale të marrin përsipër rastin tonë dhe të sqarohet njëherë e mirë ky zullum i vënë mbi ne.

Nuk do të ndalemi asnjëherë të kërkojmë drejtësi dhe të shpërfaqim deri në fund këto padrejtësi që na janë bërë.