Deputetja e PDK-së, Blerta Deliu-Kodra, në një intervistë për “Front Online”, ka theksuar se tanimë kjo parti është e fokusuar në menaxhimin e pandemisë Covid-19, duke shtuar që janë të gatshëm për zgjedhje posa të krijohen kushtet.
Shqetësim ajo ka shprehur edhe për mënyrën e seleksionimit të personave që janë vendosur në karantinë.
LEXO EDHE: Deputetja e PDK-së: Qeveria “Kurti” për 100 ditë, 100 skandale
Ajo ka theksuar që ka pasur seleksionim të personave që janë vendosur në konvikte.
“Ju jeni dëshmitarë të seleksionimit të personave që i kanë ngritur shqetësimet partitë opozitare. Disa qytetarë kanë gëzuar privilegjin që të mos qëndrojnë të izoluar për javë të tëra, përderisa ka pasur qytetarë që janë selektuar dhe nuk i kanë respektuar masat e kërkuara të karantinës”, ka thënë ajo.
Deliu-Kodra nuk e la pa e përmendur edhe rastin e djalit nga Gjilani i cili humbi jetën në Qendrën e Studentëve në Prishtinë.
“Natyrisht rasti më i ndejshëm dhe më i rëndë ka qenë rasti fatal i vdekjes së 25-vjeçarit, pra humbjes së jetës së një të riu që e ka përshkallëzuar edhe më tepër këtë gjendje, prandaj po konsiderojmë që ka munguar një qasje dhe një vullnet politik i kësaj qeverie për të adresuar pandemisë. Fundja është dashur që të kërkohet edhe me tepër angazhim nga të gjitha subjektet politike”, ka thënë ajo për Front Online.
