Dëme materiale në ekonomitë familjare nuk u shkaktuan në komunën e Podujevës.

Megjithatë, erërat e forta të së shtunës dhe të dielës s`kaluan pa shkaktuar telashe atje.

Disa fshatra të LLapit mbeten pa energji elektrike, njoftoi për “Front Online” kryetari i komunës, Shpejtim Bulliqi.

Më e prekur ishte pjesa perëndimore e kësaj ane.

“Një pjesë e madhe e kësaj trases që e rrok, Llapashticën, Lluzhanin, Llugat ka qenë për një periudhë të gjatë kohore pa rrymë. Është një trase që kalon nëpër terren malor. Andaj edhe ka pasë probleme”, u shpreh Bulliqi për “Front Online”.

Ky tha se furnizimi me rrymë tashmë është rregulluar.

“Po, tash kanë energji elektrike këto fshatra”, theksoi Bulliqi për “Front Online”.

KEDS-i ka shtuar ekipet në terren, në mënyrë që të sanojnë dëmet e shkaktuara.

“Kërkojmë mirëkuptimin e konsumatorëve tanë në këto zona të afektuara nga erërat dhe shpresojmë se në një afat sa më optimal gjendja me furnizim me energji elektrike do të kthehet në normalitet”, thuhet në njoftimin e KEDS-it.

Erërat e dy ditëve të fundit hynë në kategorinë e fatkeqësive natyrore dhe si të tilla mundë të jenë të rrezikshme e të shkaktojnë dëme, por edhe të rrezikojnë jetën e vet qytetarëve të vendit.

Kështu ka thënë drejtor ekzekutiv i Qendrës Kërkimore për Politika të Sigurisë (SPRC) dhe njohësi i çështjeve të emergjencave, Tahir Ahmeti, i cili ka thënë se qytetarët gjatë kësaj periudhe duhet të kenë kujdes të shtuar gjatë lëvizjeve të tyre.

“Instituti Hidrometeorologjik i Kosovës ka bërë të ditur se të dielën pasdite vendi do të përfshihet nga erërat e fuqishme të cilat do të regjistrojnë shpejtësinë mbi 12m/s”, ka thënë ai.