Numri i rasteve aktive me koronavirus në Çeki ka shkuar në 4,764, më shumë se rekordi i kaluar, i shënuar në muajin prill, kur ishin regjistruar 4,737 raste aktive. Kështu njoftoi Ministria e Shëndetësisë e këtij shteti.
Të shtunën u regjistruan 113 raste të reja dhe numri i përgjithshëm i personave të prekur nga virusi i ri në vendin e Evropës Qendrore shkoi në 13,885.
Shteti me 10.7 milionë banorë deri më tani i ka regjistruar 358 viktima, që është shifër shumë më e vogël në krahasim me shumë vende të tjera evropiane, shkruan “The Guardian”, transmeton Gazeta Express.
Rritja e numrit të rasteve aktive erdhi pasi që disa ditë me radhë u regjistruan mbi 100 raste në ditë, duke e kaluar numrin e personave të shëruar. Shumë prej personave të infektuar së voni kanë pasur simptoma më të lehta se ata që janë prekur në fazën e parë të përhapjes.
Që nga largimi i masave kufizuese, autoritetet janë zotuar se nuk do ta kthejnë izolimin në tërë vendin, por do të marrin masa vetëm në zonat ku ka përhapje lokale.
