Deputeti i Lëvizjes Vetëvendosje, Shpejtim Bulliqi i ka reaguar kryetarit të Komunës së Gjilanit për deklaratën se duhet dhënë 17 fshatra për të marrë Luginën e Preshevës.
Bulliqi në një postim në rrjetin social Facebook shkruan se nuk janë në pyetje 17 fshatra të vogla siç po pretendon ai, por anë 197km2 me shumë fshatra që historikisht kanë qenë pjesë e Kosovës.
Lexoni të plotë postimin:
“Pas paraqitjes së mbrëmshme në debat televiziv (TV Dukagjini) të z.Lutfi Haziri, i cili ndër të tjera deklaroi se në shkëmbimet e mundshme territoriale mes Kosovës dhe Serbisë, ne duhet t’i japim 17 fshatra për të marrë Luginën e Preshevës si pjesë të Kosovës. Për ta korrigjuar z.Hazirin, nuk janë në pyetje 17 fshatra të vogla siç po pretendon ai, janë 197km2 me shumë fshatra që historikisht kanë qenë pjesë e Kosovës, ndërsa ajo çka po kërkon Serbia haptas tash është shumë më shumë se ato 197km2, ku Serbia i ka rritur pretendimet e saj pas deklarimeve të disa prej eksponentëve politik që janë bartës institucionesh në Kosovë, se duhet të ndodhë shkëmbim territorial mes Kosovës dhe Serbisë dhe duhet të përmirësohen gabimet historike.
Do të ishte mirë nëse ka fakte apo informata shtesë z.Haziri që t’i publikojë ato për të cilat po flet, sepse faktet shkencore na thonë ndryshe, deklarata si këto na dëmtojnë shumë ku ende pa na njohur Serbia me kufijtë aktual, politikanë të pamatur të vendit tonë japin oferta që na dëmtojnë shtetësinë dhe territorin. Të gjithë shqiptarët e Luginës kanë dëshirë të jenë bashkë në shtetin e Kosovës, por realiteti është i tillë çfarë është, dhe nuk guxojmë të bëjmë tregti me toka dhe pasuri natyrore të Kosovës.
Shkëmbime territoriale mes Kosovës dhe Serbisë, nuk ka pas as gjatë kohës së Ish-Jugosllavisë, ka pasur grabitje tokës së Kosovës nga Serbia, por ka kaluar ajo kohë”.
