Pyetja nëse udhëheqësit e Serbisë dhe Kosovës e dinin se çfarë po nënshkruanin në Uashington, ku morën përsipër të hapnin ambasada në Jerusalem, duhet t’u drejtohet atyre, pasi Bashkimi Evropian nuk ishte informuar për këtë, tha sot përfaqësuesi i Komisionit Evropian Peter Stano në Bruksel.

“Ju pyetni nëse ata e dinin se çfarë po nënshkruanin. Mendoj se kjo është një pyetje shumë e mirë për ta “, tha Stano, duke iu përgjigjur pyetjes së gazetarëve, raporton agjencia kroate e lajmeve Hina.

Presidenti i Serbisë, Aleksandar Vuçiq, nënshkroi një dokument në Uashington javën e kaluar që angazhonte Serbinë për të zhvendosur ambasadën e saj në Izrael nga Tel Aviv në Jerusalem.

Kryeministri i Kosovës, Avdulah Hoti, nënshkroi një dokument të ngjashëm në të cilin ai ndërmori që Kosova të hapë ambasadën e saj në Izrael në Jerusalem kur të vendosen marrëdhëniet diplomatike midis Kosovës dhe Izraelit.

Stano shtoi se Bashkimi Evropian kishte informacion mbi aspektet ekonomike të takimit midis Serbisë dhe Kosovës në Uashington, por që nuk dinte për pjesën që lidhej me vendosjen e marrëdhënieve midis Kosovës dhe Izraelit dhe zhvendosjen e ambasadës serbe.

Ai kujtoi se BE është neutrale në lidhje me Jerusalemin, përkatësisht ajo mbron një zgjidhje “në modelin e dy shteteve” – Izraelin dhe Palestinën, të cilat mund të bashkëjetojnë në mënyrë paqësore dhe Jerusalemi të jetë kryeqyteti i të dy shteteve.

Ndryshe, asnjë vend anëtar i Bashkimit Evropian nuk ka transferuar ambasadën në Jerusalem.