Kryetarja e Unionit Socialdemokrat, Duda Balje sot është takuar me kryetarin e Lidhjes Demokratike të Kosovës, Lumir Abdixhikun.
Temë e takimit siç u bë e ditur ishte thellimi i bashkëpunimit mes LDK-së dhe SDU-së, raporton Front Online.
Lidhur me takimin e saj më Abdixhikun dhe mundësinë e kalimit të Baljes në këtë parti, për Front Online ka folur vet deputetja, Duda Balje.
“Nuk kemi diskutuar asgjë për kalimin në LDK, nuk ka qenë absolutisht temë kalimi në LDK nga koalicioni”, ka thënë Balje për Front Online.
Ajo, ka treguar se takime të tilla do të ketë edhe me partitë e tjera.
“Ne kemi planifiku me vizitua edhe PDK-në, edhe AAK-në, edhe Vetëvendosje pra të gjitha partitë”, është shprehur Balje, për Front Online.
Balje, ka treguar edhe arsyen se përse e ka vizituar të parën LDK-në.
“Unë sot kam qenë aty si kryetare e Unionit Socialdemokrat dhe kemi pas një takim shumë të mirë, shumë transparent, kemi biseduar për problemet politike dhe kemi biseduar për mundësinë për bashkëpunim sepse LDK-ja është partia më e vjetër dhe ne kemi edhe interesa të përbashkëta”, ka thënë ajo për Front Online
Lëvizja Vetëvendosje e Albin Kurtit dhe Unioni Social-Demokrat (SDU) e Duda Baljes lidhen marrëveshje koalicioni pas zgjedhjeve nacionale të 14 shkurtit, 2021./Front Online