Kryetari i Mitrovicës së Jugut, Agim Bahtiri ka pritur në takim kryetarin e PD’së, Lulzim Basha.
Bahtiri ka falënderuar Bashën për vizitën teksa ka thënë se këtë radhë e ka pritur si kryetar partie kurse në vitet në vijim do ta pres si kryeministër të Shqipërisë, raporton Express.
“Kësaj radhe e kam pritur si kryetar të partisë, ndërsa në vitet në vijim do t’a pres si kryeministër të Shqipërisë, për arsye se këtij vendi dhe populli i duhet një njeri që i’a vlen të jetë shërbëtor i shqiptarëve. Gjithashtu i shprehi mbështetje të fuqishme për sfidat që do t’i presin, dhe bashkërisht ne do të jemi që ky njeri evropian dhe i shkolluar në Evropë, të jetë në detyrën ku jo vetëm unë por dëshirojmë krejt Kosova”, ka thënë Bahtiri.
Tutje Bahtiri ka shtuar se qytetarët e Shqipërisë duhet të vetëdijësohet dhe të sjellë Lulzim Bashën në krye të qeverisë shqiptare.
“Prandaj ardhja e z. Basha në krye të Qeverisë së Shqipërisë do të ndryshoj gjithçka në të mirë të popullit, sepse ka vizion evropian, përveç se do të ndikoj për të mirë në zhvillim të vendit, do të jetë ndihmesë e madhe edhe për Kosovën në çështjet ndërkombëtare, e jo si të tjerët që kontribuojnë në ndarje dhe copëtim të Kosovës, dhe nënshtrim ndaj planeve të Serbisë, ku Kosovën e dëmtojnë në tërësi edhe në aspektin ekonomik, gjeografik dhe kulturor”, shtoi ai.
Ndërkaq, Lulzim Basha qytetin e Mitrovicës e ka quajtur kryeqytet të kombit.
“Dua të ju falënderoj në radhë të parë për dimensionin kombëtar, qëndresën tuaj në emër të banorëve dhe të qytetarëve të Mitrovicës kundër copëtimit të Kosovës, i cili plan do të niste me copëtimin e qytetit të Mitrovicës. Qëndrimi juaj i qartë dhe i prerë për gjithë këto vite, në emër të qytetarëve që ju kanë vlerësuar me të drejtë administrimin dhe drejtimin e qytetit dhe komunës së tyre, ka qenë e një vlerë e jashtëzakonshme për të përcjellë vullnetin e vërtetë të njerëzve, si një faktor i pazëvendësueshëm në vendimmarrjet e këtij lloji dhe si një qëndresë shembullore për të gjithë ata që marrin përsipër të përfaqësojnë vullnetin e qytetarëve të tyre. Dhe në këto kuadro jam krenar që edhe Partia Demokratike, unë personalisht jemi bashkangjitur qëndrimit të drejtë dhe konsekuent kundër copëtimit të Kosovës, ruajtjes së tërësisë territoriale si parakusht i vazhdimësisë së sovranitetit dhe Pavarësisë së Kosovës”, tha Basha.
