Avokati i Thaçit reagon pas aplikimeve të 19 personave që u paraqitën si viktima të ish-krerëve të UÇK-së
Në Gjykatën Speciale në Hagë 19 persona janë paraqitur si viktima direkte dhe indirekte në rastin e aktakuzës së Zyrës së Prokurorit të Specializuar kundër Hashim Thaçit, Kadri Veselit, Rexhep Selimit e Jakup Krasniqit.
Zyra për Pjesëmarrjen e Viktimave në kuadër të Gjykatës Speciale ka rekomanduar që nga këta 19 persona ku ka shqiptarë e serbë, 18 prej tyre të procedohet tutje dhe aplikacionet e tyre të pranohen, ndërsa njërit t’i refuzohet aplikacioni.
David Hooper, avokat i Hashim Thaçit, për këtë çështje ka paraqitur në Speciale një parashtresë me 13 faqe material, ku e ka kritikuar Zyrën për Pjesëmarrjen e Viktimave, raporton Express.
“ZPV pretendon që gjyqtari i procedurës paraprake nuk duhet ta konsiderojë veten të kufizuar nga ngjarjet dhe vendet e përcaktuara shprehimisht në Aktakuzë ose oraret e saj”, shkruan Hooper.
Sipas Hooper, është krejtësisht e paarsyeshme që një të akuzuari në aktakuzë t’i m’vishen edhe krime të pretenduara për të cilat ai nuk fajësohet apo akuzohet. Kësisoj, avokati Hooper ka kërkuar që të pranohen vetëm aplikacionet e viktimave, të cilët paraqesin prova të qartë se kanë pësuar dëm direkt dhe jo indirekt gjatë periudhës së aktakuzës.
