Bartësi i listës së koalicionit, “Bardh e Zi”, Dritan Abazoviq, pas një takimi konsultativ me Kryetarin e Kuvendit, Ivan Brajoviq, tha se kanë arritur marrëveshje që i pari i këtij institucioni do të zgjedhet më 23 shtator.

“Ne arritëm të mposhtim mafien në kushte katastrofike dhe shpresoj që Kuvendi ta tregojë atë. Për shkak të coronavirusit, ne duhet të shpejtojmë procedurën e atyre që supozohet se përfaqësojnë Qeverinë dhe Kuvendin”, tha Abazoviq, raporton vijesti.me.Ai shtoi se asnjë pengesë nuk u ndie gjatë takimit konsultativ të përfaqësuesve të listave zgjedhore me status parlamentar, transmeton Telegrafi.

“Ne tashmë kemi një propozim se kush do të ishte kryetari i Kuvendit dhe nuk mendoj se do të ketë ndonjë problem në konstituimin e saj. Sa i përket Qeverisë, do të duhet më shumë kohë për ta konstituuar, sepse ka më shumë detyrime. Kjo nuk do të ndodhë menjëherë”, pohoi ai.

Sipas rezultateve zyrtare të zgjedhjeve parlamentare, koalicioni “Odlučno za Crnu Goru! DPS – Milo Gjukanoviq” fitoi 30 vende, koalicioni “Për Ardhmërinë e Malit të Zi” 27, koalicioni “Paqja është kombi ynë” dhjetë dhe koalicioni “Bardhë e Zi” katër vende.Social Demokratët dhe Partia Boshnjake do të kenë secila nga tre deputetë si dhe dy SDP. Lista shqiptare “Nik Gjeloshaj-Genci Nimanbegu” dhe koalicioni “Jedonoglasno” do të kenë secili nga një përfaqësues.