Dy mësimdhënës në gjimnazin “Hivzi Sylejmani”, në Fushë Kosovë janë infektuar me virusin Covid-19, raporton Front Online.

Edhe pse u shfaqën raste me Coronavirus, në këtë gjimnaz mësimi po vazhdon normalisht.

Këtë e ka konfirmuar për Front Online, zëdhënësi për informim në komunë, Ali Topalli.

“Janë të infektuar 2 mësimdhënës. Janë profesorë. Mësimi nuk është ndërprerë dhe është duke vazhduar normalisht sepse nuk ka asnjë simptomë të përkeqësimit të gjendjes shëndetësore `as nga ana e stafit të shkollës, as të personelit dhe as tek nxënësit. Ata janë zëvendësuar dhe mësimi po vazhdon”, ka thënë ai.

Topalli poashtu konfirmoi që edhe stafit tjetër të shkollës i janë marrë mostra për testim, por që më pas rezultuan të gjitha negative.

“Po kanë marrë mostra edhe për personelin tjetër dhe të gjithë kanë rezultuar negativë”, ka thënë ndër të tjera ai. /Front Online/