Ditëve të fundit në Kosovë ka rënë numri i rasteve të infektuara me virusin Covid-19.

Nga klinikat e Qendrës Klinike Universitare të Kosovës, e nga spitalet rajonale, thonë se gjendje sa i përket pandemisë është më e mirë se që ka qenë në muajt e kaluar.

Sipas tyre, edhe numri i pacientëve që janë duke u trajtuar nëpër klinika e spitale, është më i vogël.

Pulmologu në Klinikën e Pulmologjisë në QKUK, Bahri Thaçi, ka thënë për Front Online, se në krahasim me muajt e kaluar është ulur numri i rasteve që kanë kërkuar trajtim në këtë klinikë.

Ai ka thënë se momentalisht në Klinikën e Pulmologjisë janë duke u trajtuar 48 pacient me Covid-19, 4 prej të cilëve janë në gjendje më të rëndë shëndetësore.

“Është ulur numri i pacientëve. Në klinikë sot janë të shtrirë 48 pacient, të cilët kryesisht janë në gjendje stabile. 3 apo 4 pacientë janë në gjendje më të vështirë”, është shprehur ai.

Thaçi ka treguar se kanë filluar përgatitjet edhe në rast të paraqitjes së rasteve me grip sezonal.

Ndërsa sa i përket virusit Covid-19, ai është shprehur se nëse ky virus nuk aktivizohet tani pasi fillimit të vitit të ri shkollor, atëherë situata do të jetë më e qetë.

“Përgatitjet janë duke bërë. Ne si staf shëndetësorë jemi me më përvojë se sa kemi qenë në fillim. Ne po besojmë që nëse virusi nuk aktivizohet tani pas fillimit të shkollës, do të qetësohet situata në përgjithësi”, ka deklaruar ai për Front Online.

Ndërsa, edhe drejtoresha e Klinikës Infektive në Qendrën Klinike Universitare të Kosovës, Lindita Ajazaj-Berisha një ditë më parë, në një intervistë për Front Online, ka thënë se numri i pacientëve me Covid, të shtrirë në këtë klinikë është përgjysmë më i vogël së muajt e kaluar.

Ajo ka deklaruar se momentalisht 57 pacientë me Covid-19 janë duke u trajtuar në Infektivë, 30 prej të cilëve janë me oksigjenoterapi.

Kjo është situata me Covid-19 në spitalet rajonale

Edhe në spitalet rajonale thuhet se është ulur numri i rasteve që po kërkojnë trajtim mjekësor për shkak të infektimit me Coronavirus.

Drejtori i Spitalit të Ferizajit, Jeton Zeqiri ka thënë se 11 persona janë të hospitalizuar për shkak të infektimit me virusin Covid-19.

Sipas tij, 10 persona janë me oksigjen.

“11 persona me Covid janë të hospitalizuar, prej tyre 10 janë me oksigjen. Ne po presim që në ditët në vijim t’i lirojmë edhe këta dhe shpresojmë të mos kemi më raste të tilla”,ka theksuar ai.

Zeqiri ka thënë se në spital kanë 80 shtretër në dispozicion për personat që paraqiten me komplikime të rrugëve respiratore.

“Gjendja është shumë më e mirë tani. Në qoftë se  ka persona me komplikime të rrugëve respiratore, ne kemi kapacitet prej 80 shtretërve dhe besoj se do ja dalim”, ka thënë ai.

Kaq persona me Covid janë duke u trajtuar në spitalin e  Gjilanit

Ndërsa, drejtori i Spitalit të Gjilanit, Nisret Hajrullahu ka treguar se në këtë spital 21 pacient të infektuar me Coronavirus janë duke u trajtuar.

Sipas tij, numri i pacientëve të infektuar është më i ulët se muajve të kaluar.

“Ne kemi 21 pacient në spital, tre janë në kujdesin intensiv dhe 18 në repartin e infektivës. Numri i rasteve ka qenë i ulët, kanë qenë 21 kontrolle për një ditë me dy pranime”, ka thënë ai.

Hajrullahu ka thënë tutje se momentalisht situata me pandeminë është më e menaxhueshme, dhe se gjithçka është nën kontroll.

“Ne kemi dedikuar 82 shtretër të cilët kanë qenë prapë në disponim të njësive të Covidit. Tani e kemi bërë një përvojë edhe në organizim edhe në menaxhimin e gjendjes.

Besoj se do të ja dalim”, ka shtuar ai për Front Online./Front Online/