Përshëndetja me bërryl, e cila u shndërrua në një zakon pas shpërthimit të epidemisë së koronavirusit, duhet të shmanget, pasi është shumë e rrezikshme.
Të paktën kështu pretendon kreu i OBSH-së, Tedros Adhanom Ghebreyesus.
Ai shpërndau në rrjetin social Twitter një mesazh të ekonomistes Diana Ortega, e cila deklaronte se OBSH nuk rekomandon përshëndetjen me bërryl, por përshëndetjen duke vendosur dorën në “zemër”.
“Drejtori i OBSH-së Tedros Adhanom Ghebreyesus nuk e këshillon përshëndetjen me bërryla, pasi nuk ruhet distanca e sigurisë, duke rritur kështu mundësinë për transmetimin e infeksionit”, shkroi në Twitter, Ortega.
Një mesazh ky që ka vendosur në mëdyshje shumë persona, duke përfshirë politikanë, por edhe shumë personazhe të jetës kulturore, e kanë praktikuar këtë lloj përshëndetjeje sidomos pas rekomandimit për të mos shtrënguar duart si një masë parandaluese, fillestare, për transmetimin e virusit Covid-19 nga njëri person tek tjetri.
Pavarësisht kësaj, nëse rikthehemi në kohë, duke filluar që nga data 7 mars, kreu i Organizatës Botërore të Shëndetësisë e kishte rekomanduar si një praktikë të gabuar përshëndetjen me bërryla.
“Kur përshëndetni njerëzit është shumë më mirë ta shmangni përshëndetjen me bërryla, pasi ju zvogëloni distancën ndaj një personi tjetër në më pak se 1 metër. Më pëlqen të përshëndes njerëzit, duke vendosur dorën në zemër”, shkroi drejtori i OBSH-së Tedros Adhanom Ghebreyesus.
Një këshillë që në atë kohë kaloi pa rënë në sy.
