Deputeti i Lëvizjes Vetëvendosje, Agon Batusha, përmes një postimi në rrjetin social Facebook, e ka kritikuar kryetarin e Komunës së Gjakovës, Ardian Gjini, për mos kujdesin e komunës për  Çabrati  i cili është mbuluar nga mbeturinat e shumta, raporton portali FrontOnline.

Batusha, ka thënë se çështja e ambientit nuk i intereson qeverisjes së Gjakovës, pasi që siç thotë ai po të ishte ambienti tender komuna do të tregonte më shumë interes.

Ai e ka kritikuar Gjinin edhe për punësimin e militantëve  partiak që po bëhen në këtë komunë.

“Ambienti është gjëja e fundit që i intereson qeverisë komunale. Nëse ambienti është tender, apo sjellë vota, ndoshta ndonjë punësim për familjarët e tyre apo militantët e pakualifikuar, ndoshta atëherë PO, do të interesoheshin”, ka shkruar Batusha.

Postimi i plotë i tij:

Pamjet nga Çabrati, më sakt tek Lugu i Dragonit.

Shkatrrimi i kësaj pjese të qytetit, njëherit simbolit të Gjakovës është tregues se ku kemi përfunduar ne si shoqëri. Mbeturinat inerte, që dalloheshin që janë hudhur së fundmi, sendimentohen njëra pas tjetrës duke helmuar tokën, ndotuar ajrin, prishur peisazhin dhe shpejtë duke na helmuar edhe neve.

Në këtë anë të Çabratit do doja të shihja shtigje për ecje, për vrapin, shtigje për bicikleta, mbjellje të pemëve dekorative, ulëse për vizitorë dhe çdo gjë që është rekreative dhe ambientale.

Dua të shohë Çabratin në namin e dikurshëm, por me infrastruktur moderne, miqësore me ambientin, të mbushur me bashkëqytetarë që dalin dhe thithin ajrin e pastër dhe e shijojnë pamjen mbresëlënëse të qytetit tonë dhe fshatrave piktoreske.

Por, JO! Ambienti është gjëja e fundit që i intereson qeverisë komunale. Nëse ambienti është tender, apo sjellë vota, ndoshta ndonjë punësim për familjarët e tyre apo militantët e pakualifikuar, ndoshta atëherë PO, do të interesoheshin.

Deri atëhere, na mbetet neve të e ruajmë Çabratin.