Pas dështimit të takimit të 27 qershorit për vazhdimin e dialogut  në Uashington me ndërmjetësimin e Richard Grenell, me 2 shtator është palnifikuar që të mbahet një takim i dytë, e ku dialogues pritet të jenë kryeministri kosovar Avdullah Hoti dhe presidenti serb Aleksandër Vuçiq.

Edhe pse, ky raund i bisedimeve i udhëhequr nga amerikanët është afruar, Qeveria e Kosovës, po hesht për sa i përket temave që do të parashtrohen në tryezën e ballafaqimit.

Kritik ndaj kësaj qasje të Qeverisë, janë shprehur anëtarët e shoqërisë civile, të cilët po thonë që kjo paraqet jo transparencë të këtij procesi.

Arbër Fetahu, nga Grupi për Studime Juridike dhe Politike, ka thënë për Front Online, se kjo është një shkelja më e madhe që po i bëhet këtij procesi.

“Kjo është një nga mangësitë më të mëdha dhe një nga shkeljet më të mëdha e që po i bëhet këtij procesi sepse ka një mungesë të transparencës, prandaj edhe ne këtu kur diskutojmë nuk mund që të predikojmë saktë se çfarë mund të diskutohet dhe se çfarë mund të jenë të dalat nga dialogu”, ka thënë ai për Front Online.

Për sa i përket kësaj çështje, Front Online ka dërguar pyetje edhe në Zyrën e Kryeministrit, por të njëjtit as pas tre ditësh nuk kanë shprehur gatishmëri të përgjigjen në pyetjet e dërguara nga portali.

Fetahu: Pritjet nuk duhet të jenë të mëdha, SHBA-të po duan ta riaktualizojnë rolin në dialog

Arbër Fetahu, nga Grupi për Studime Juridike dhe Politike, lidhur me takimin e 2 shtatorit për vazhdimin e dialogut Kosovë-Serbi,  ka thënë për Front Online që pritjet nuk duhet të jenë të mëdha.

“Realisht tanimë pritjet nuk duhet që të jenë shumë të mëdha nga takimet për shkak që kemi pasur shumë ndryshime përgjatë trajektores së dialogut. Dihet dështimi i 27 qershorit, pastaj roli i BE-së më i fuqishëm në dialog dhe në një formë venitja e rolit të SHBA-së  pas 27 qershorit. Gjithsesi ky takim është mjaft i rëndësishëm për Kosovën pasi që dihet që SHBA-të janë superfuqi dhe në këtë rast dëshirojnë që të ri aktualizojnë rolin e tyre në dialog”, ka thënë Fetahu për Front Online.

Sipas tij, nuk pritet që në Uashington të bisedohet për njohje reciproke por për çështjet ekonomike mes shteteve.

“Çka mund të pritet nga ky takim edhe pse vështir të definohet dhe të predikohet, mund të ketë diskutime rreth çështjeve ekonomike dhe mund të ketë një matje të pulsit nga ana e SHBA-ve tek dy shtetet, tek Kosova dhe Serbia, rreth një marrëveshje të mundshme. Por nuk duhet që ta kemi larg mëndësh që SHBA-të mund ta kenë larguar fokusin siç e kanë pasur më parë mbi njohjen reciproke pasi që ka vazhduar inkuadrimi i BE-së dhe deklarimi i Richard Grenell se do të merren më shumë me çështjen ekonomike”, ka thënë ai.

Ai shprehet se Kosova duhet të jetë e prerë që në Uashington të mos diskutohet për kufijtë e saj.

“Ajo çfarë duhet të kërkojë Kosova dhe ta vendos në tavolinë është se nuk duhet që të vazhdojë me dialogime rreth çështjeve të Kosovës dhe rreth çështjes së kufijve. Duhet ta rishqyrtojë dhe ta ri aktualizojë çështjen se Kosova duhet të njihet në mënyrë reciproke nga Serbia dhe të kërkojë vetëm njohje dhe asgjë më pak. Në këtë mënyrë pozicioni i Kosovës do të jetë më i fortë dhe çka mund të pritet pastaj në dialog, varet nga konsekuencat apo nga mënyra se si do të vazhdojë dialogu”, ka thënë Fetahu./Front Online