Si para 5 vjetëve ashtu edhe tash, mendimin për Gjykatën Speciale, e ka të njëjtë.
Për Nasim Haradinajn, nënkryetarin e OVL-së, ky trup i ndërkombëtarizuar i gjygjsisë kosovare, është politik, një etnik – kundra shqiptarëve.
Etiketat si këto ai i mbështet në misionin e vetëm mbi të cilin thotë se u themelua ky mekanizëm.
“Ma çon mallin e gjykatave politike në 81, gjykata për gjykimin e shqiptarëve në Kosovë. Eshte nje gjykate një etnike”, deklaroi ai për Front Online.
Ish-Komandanti i Koshares nuk e di se kur dhe ndaj kujt do të konfirmohen aktakuzat e para. Megjithatë është fort i bindur se asnjëri prej bashkëluftëtarëve të tij nuk do të ndëshkohet nga Specialja.
Për këtë ka një arsye të fortë.
“Nuk besoj që do të përfundojë me ndonjë rezultat. Kur është Gjykatë politike, me marrëveshje politike, ajo edhe bjen”, tregoi ai për Front Online.
Por pavarësisht këtij mendimi optimist, në OVL, nuk kanë qëndruar duarkryq. Drejtuesit e saj, të premten, morën një nismë, duke dërguar në Kuvend, kërkesën për ndryshimin e Ligjit për Specialen.
“Ne tash kemi kërkuar permbushjen e amandamenteve. Dua që Gjykata t`i njeh të gjitha krimet që kanë ndodh në Kosovë. T`i ndjek edhe krimet serbe, e edhe ato të UÇK-së”, theksoi Haradinaj për Front Online.
Ky pret që kërkesa e tyre, e cila në vete përmban edhe ndryshimin e disa amandamenteve tjera, të marrë aminin e deputetëve.
Këta të fundit, sipas tij, zgjidhje tjetër nuk kanë, ndonëse thotë se është në dijeni se disa prej tyre ishin vet ata që e votuan Specialen në vitin 2015.
“Presim që deputetët ta votojnë. Përndyshe i bjen që nuk kanë deklarim për krimet serbe në Kosovë. Nuk iu kena lënë rrugë tjetër, veç mos me mujt me u justifiku”, u shpreh Haradinaj për Front Online.
E për deputetët që i nxorën punë këtyre dhe pjesëtarëve të tjerë të UÇK-së, kur votuan pro themelimit të Gjykatës, Haradinaj, ka veç një koment të shkurtë.
“Faqezi. Laperhane”.
Prokuroria e Specializuar deri tash ka ftuar dhjetëra ish-pjesëtarë të Ushtrisë Çlirimtare të Kosovës për intervistim pranë Gjykatës Speciale.
Derisa e njëjta zyre ka ngritur vetëm dy aktakuza, njëren ndaj Thaçit e tjetrën ndaj Veselit, aktakuza këto që patën dridhur skenën politike kosovare, por që të njëjtat akoma nuk janë konfirmuar.
