Përfaqësuesi i posaçëm i BE-së për dialogun Kosovë-Serbi, Miroslav Lajçak, pritet që të hënën ta vizitojë Kosovën, raporton Front Online.
Presidenti i vendit Hashim Thaçi, është pyetur sot rreth kësaj vizitë, dhe lidhur me atë se a do ta takojë Lajçakun. Thaçi theksoi se do t`i përgjigjet takim vetëm në rolin e presidentit të vendit.
“Unë ende zyrtarisht nuk jam i informuar por do të shohim agjendën dhe prioritet të cilat i ka në përkushtimin e tij përfaqësuesi i BE-së dhe pastaj do t`i përgjigjem si president i vendit sepse është detyrë e imja”, ka thënë Thaçi.
Në ndërkohë presidenti ka theksuar se çdo përfaqësues ndërkombëtar duhet ta trajtojë Kosovën si shtet i pavarur dhe sovran.
“Për ne është me rëndësi që përfaqësuesit ndërkombëtarë që merren me këtë çështje ta trajtojnë Kosovën si vendi i pavarur dhe sovran. Çdo qasje tjetër është e dështuar. Ne kemi besim të plotë në qasjen e SHBA-ve që ka kontribuar për liri, pavarësi dhe tani edhe për proceset e të ardhmes”, ka thënë presidenti.
Presidenti Thaçi vazhdimisht është deklaruar kundër emërimit të Miroslav Lajçak, në pozitën e përfaqësuesit të posaçëm të BE-së për dialogun Kosovë-Serbi, për arsye se i njëjti është me prejardhje nga Sllovakia, shtet ky që nuk e njeh Kosovën. /Front Online
