Ministrat gjermanë njoftuan të mërkurën se vendi i tyre e ka shtyrë afatin e masave kufizuese për udhëtime nga vendet joevropiane, por do t’i largojë kontrollet kufitare me të gjitha shtetet fqinje nga mesi i qershorit.

Në kohën kur kriza e koronavirusit në shumë shtete evropiane po lehtësohet disi, ministri i jashtëm gjerman, Heiko Maas, tha se Gjermania ende nuk i ka sistemet me pjesën tjetër të botës për t’i vlerësuar dhe koordinuar udhëtimet pa i marrë parasysh edhe rreziqet e mundshme të pallogaritshme.

“Ne nuk mund të rrezikojmë dhe nuk do të rrezikojmë që t’i lëmë gjermanët të bllokuar në mbarë botën përsëri këtë verë apo që t’i lëmë udhëtarët që të kthehen në Gjermani pa e vërejtur virusin”, tha ministri Maas në një deklaratë.

Duke qenë i vetëdijshëm se gjermanet mund të dëshirojnë të udhëtojnë drejt Turqisë, Shteteve të Bashkuara, vendeve të Afrikës Veriore ose pjesës juglindore të Azisë, Maas tha se qeveria do të vazhdojë ta shqyrtojë vërejtjen për udhëtime para shtatorit.

Gjermania tashmë ka vendosur që ta largojë ndalimin e udhëtimit për shtetet anëtare të BE-së, Britaninë e Madhe, Islandën, Norvegjinë, Lihtenshtajnin dhe Zvicrës nga 15 qershori.