Një gjykatë austriake e ka dënuar një kolonel të pensionuar me tri vjet burgim pasi e shpalli fajtor për spiunazh për shërbimin e inteligjencës ushtarake ruse për më shumë se 25 vjet.

Procesi gjyqësor kundër ish-zyrtarit 71-vjeçar është zhvilluar prapa dyerve të mbyllura dhe emri i tij nuk është bërë publik, shkruan “Free Europe”.

Një grup gjykatësish në Salzburg e shpallën fajtor ish-kolonelin për zbulim të sekreteve shtetërore. Më saktësisht, ai u shpall fajtor për kryerje të operacionit sekret të inteligjencës kundër Austrisë, duke tradhtuar rreth sekreteve shtetërore dhe për zbulim të qëllimshëm të sekreteve ushtarake.

Dënimi më i lartë që do të mund të jepej për këto akuza ishte dhjetë vjet burgim. Megjithatë, ish-koloneli u dënua me vetëm tri vjet burgim dhe u lirua për shkak të kohës së kaluar në paraburgim që nga arrestimi në nëntor të vitit 2018.

Sipas aktakuzës, i pandehuri i ka ofruar sekrete ushtarake Rusisë nga viti 1992 deri në shtator të vitit 2018 në këmbim të 280,000 eurove.

Sidoqoftë, avokatët e tij thanë se klienti i tyre nuk ka zbuluar ndonjë sekret qeveritar apo ushtarak, por vetëm ka ofruar të dhëna që kanë qenë të qasshme për publikun. Sipas tyre, ish-koloneli për këtë punë i ka marrë 220,000 e jo 280,000 euro.