Ish-zëdhënësi i Ushtrisë Çlirimtare të Kosovës, Jakup Krasniqi, ka kujtuar dy data të rëndësishme për historinë e re të Kosovës.

E para ka të bëjë me 22 vjetorin e lajmit që paralajmëronte lirinë, çlirimin e bashkimin, ndërsa e dyta me 21 vjetorin e çlirimit të Kosovës.

“Në këtë ditë, para 22 vite ishte lajm që paralajmëronte Lirinë, Çlirimin e Bashkimin! Një vit më vonë, tash e 21 vjet, erdhi Dita e shumëpritur nga brezat – Çlirimi i Kosovës”, ka shkruar Krasniqi në Facebook.

Ai thotë se gjithçka filloi me dashuri, me mend, me vendosmëri e guxim të madh, ndërsa “erdhi me ndryshim epokal”.

Duke uruar Kosovën për suksese të mëtejme, Krasniqi postoi të plotë komunikatën e 10 qershorit të vitit 1998, ku, përpos që UÇK-ja bënte thirrje që t’i dërgoheshin ndihma nga fondi “Vendlindja Thërret”, po atë ditë Krasniqi ishte emëruar zëdhënës i Ushtrisë Çlirimtare të Kosovës.

“Shtabi i Përgjithshëm fton qeverinë të egzil të Bukoshit që mjetet e derdhura nga populli të jepen për luftën për lirinë pa të cilën s’ka liri e pavarësi, s’ka as çlirim e bashkim kombëtar. Ata që sot kanë mundësi ta ndihmojnë lirinë e çlirimin dhe nuk e bëjnë, marrin mbi vete një përgjegjësi të madhe kombëtare, politike e historike”, shkruante ndër të tjera në komunikatën Nr. 3 të Shtabit të Përgjithshëm të UÇK-së.

Në vijim ju sjellim të plotë këtë komunikatë, siç e ka postuar vetë Jakup Krasniqi:

DEKLARATË PËR OPINION Nr. 3

Rezistencën e armatosur të popullit shqiptar në Kosovë nuk janë duke e bërë qytetarët e paorganizuar që e mbrojnë vetëm pragun e shtëpisë, por populli i organizuar në Ushtrinë Çlirimtare të Kosovës i udhëhequr nga Shtabi i Përgjithshëm që kryekreje lufton për liri, për çlirim e bashkim kombëtar, për nder e dinjitet njerëzor e kombëtar.

Shtabi i Përgjithshëm i UÇK-së vlerëson se situata është serioze, me rreziqe të shumta e të paparashikuara dhe si e tillë kërkon: vendosmëri,urti e qasje serioze për t`u zgjedhur. Kërkon që shqiptaret t’i koordinojnë e bashkërendojnë mendimet e veprimet në shërbim të çlirimit e të bashkimit kombëtar.

Ushtria Çlirimtare e Kosovës fton shqiptarët në të gjithë hapësirën kombëtare që të bashkohen rreth flamurit të Skënderbeut, duke tejkaluar me guxim e vendosmëri të gjitha barrierat e bashkimit të kombit, si krahinorizmat,besimet, partitë a ideologjitë e përçarjes.

Shtabi i Përgjithshëm i UÇK-së iu drejtohet të gjithë bashkëkombëseve,të fshatit e të qyteteve, bashkatdhetarëve kudo që janë në botën e jashtme që t’i derdhin mjetet financiare në fondin “Vendlindja thërret”, në fondin e çlirimit e të bashkimit kombëtar. Shtabi i Përgjithshëm fton qeverinë të egzil të Bukoshit që mjetet e derdhura nga populli të jepen për luftën për lirinë pa të cilën s’ka liri e pavarësi, s’ka as çlirim e bashkim kombëtar. Ata që sot kanë mundësi ta ndihmojnë lirinë e çlirimin dhe nuk e bëjnë, marrin mbi vete një përgjegjësi të madhe kombëtare, politike e historike.

Lufta e jonë për liri e çlirim ka hyrë në një fazë të re që e karakterizojnë: cilësia, masivizimi dhe shtrirja hapësinore. Kjo edhe e obligon Shtabin e Përgjithshëm që përmes zëdhënësit të tij të komunikoj më shpesh me opinionin e brendshëm e të jashtëm përmes formave të ndryshme të paraqitjeve publike. Kjo bëhet edhe për t’i penguar paraqitjet e paautorizuara e të papërgjegjësi të individëve jo kompetent. Shtabi i Përgjithshëm ka vendosur që për zëdhënës të tij para opinionit të caktoj profesorin e historisë, të burgosurin politik, që ka të kryera edhe studimet posdiplomike – Jakup Krasniqin nga Drenica

Prishtinë, 10. 06 1998 Shtabi i Përgjithshëm i UÇK-së