Sekretari amerikan i shtetit, Mike Pompeo, po e zhvillon një vizitë zyrtare në Izrael. Gjatë kësaj vizite, ai e akuzoi Iranin për nxitje të terrorit, ndonëse populli i këtij vendi po vuan nga përhapja e koronavirusit.

Kryediplomati amerikan do të zhvillojë takime me kryeministrin izraelit, Benjamin Netanyahu dhe anëtarë të tjerë të qeverisë së këtij shteti, me të cilët do të diskutojë për aktivitetet e Iranit në Lindjen e Mesme, konfliktin në Siri, koronavirusin dhe për disa çështje të tjera.

Para se ta fillonte takimin prapa dyerve të mbyllura me shefin e qeverisë izraelite, Pompeo nuk e komentoi planin e Izraelit për aneksimin e vendbanimeve çifute dhe territoreve të tjera në Bregun e pushtuar Perëndimor, por i dënoi veprimet e Iranit.

“Edhe gjatë kësaj pandemie, iranianët janë duke i përdorur burimet e regjimit të Ayatollah-ut për të nxitur terror në botë, edhe në kohën kur populli i Iranit po përballet kaq shumë me vështirësi. Kjo tregon shumë për shpirtin e atyre njerëzve që e udhëheqin atë shtet”, tha Pompeo.

Tensionet mes Shteteve të Bashkuara dhe Iranit janë rritur që nga ardhja në pushtet e presidentit amerikan, Donald Trump, dhe sidomos pas tërheqjes së ShBA-së nga marrëveshja bërthamore e vitit 2015 mes Iranit dhe fuqive të mëdha.

Kur zbriti nga aeroplani, Pompeo e kishte vendosur në fytyrë një maskë me ngjyrat e flamurit amerikan, por gjatë takimit me kryeministrin Netanyahu, asnjëri nga zyrtarët nuk kishte maskë, shkruan “Free Europe”.