Danimarka, e cila gradualisht po heq kufizimet në lidhje me luftën kundër koronavirusit të ri, njoftoi sot se nuk do të lejojë tubime të më shumë se 500 personave deri para 1 shtatorit.

Vendosja e këtij tavani pason ndalimin në fillim të prillit nga kreu i qeverisë, Mette Frederiksen, për të organizuar ngjarje të mëdha gjatë verës.

“Ne po shohim se ngjarjet kryesore mund të jenë vektorë të asaj që quhet super infektim. Kjo është arsyeja pse mund të themi se gjatë verës, në asnjë rast, nuk mund të lejojmë grumbullimet e më shumë se 500 njerëzve”, tha Frederiksen, pas një seance parlamentare.

Ky tavan nuk do të thotë se qeveria nuk do të zgjasë dekretin aktual, të vlefshëm deri më 10 maj, i cili ndalon takimin e më shumë se dhjetë personave.

“Ne nuk mund të jemi më të saktë tani, nuk mund ta dimë evolucionin e sëmundjes”, theksoi kryeministrja.

Kjo pasiguri në lidhje me numrin e kufizuar të njerëzve që mund të mblidhen është objekt debati në vend, si edhe në shumë vende të tjera.