Një burrë në Gjermani ka plagosur rëndë një vajzë 17-vjeçare me sëpatë pasi kërcënoi pasagjerët në një tren, tha policia. Në qytetin Guben, në kufirin me Poloninë, 38-vjeçari hipi në një tren që udhëtonte midis qyteteve gjermane lindore Frankfurt am Oder dhe Cottbus.

Burri, i identifikuar nga policia si shtetas polak, vrapoi nëpër disa vagona përpara se policia të njoftohej për rastin. Ai dëmtoi pjesë të brendshme të trenit dhe shkatërroi ekranet televizive. Burri më pas sulmoi vajzën 17-vjeçare me sëpatë dhe e plagosi në kokë, tha zëdhënësi i policisë.

Oficerët e policisë që hipën në tren i morën mjetin metalik. Viktima është dërguar në spital, por lëndimet e saj janë jashtë rrezikut për jetën. I dyshuari ndodhet në paraburgim për t’u marrë në pyetje. Policia nuk dha detaje të mëtejshme rreth incidentit, por tha se aktualisht nuk ka asnjë indikacion se krimi ishte i motivuar fetarisht apo politikisht.

Në shkurt, një palestinez goditi me thikë disa pasagjerë në një tren që udhëtonte nga qyteti verior gjerman i Kielit për në Hamburg. Dy persona humbën jetën, pesë të tjerë u plagosën. I dyshuari, i cili tashmë është i njohur për policinë, ditë më parë është liruar nga paraburgimi./FrontOnline/