Ushtruesi i detyrës së drejtorit për Integrime evropiane koordinim të politikave dhe çështje ligjore në MASHT, Ferit Idrizi muaj më parë e kishte denoncuar në polici ministrin e Arsimit, Shyqiri Bytyqi për kërcënim fizik, raporto Front Online.
Pas denoncimit që Idrizi I’a bëri Bytyqit, ai përmes një vendimi të cilin e ka siguruar Front Online,ishte pezulluar nga punë për tre muaj.
Në vendim thuhet se: “ Ferit Idrizi I sistemuar në pozitën u.d. Drejtor I Departamentit për integrime evropiane koordinim të politikave dhe çështje ligjore pezullohet nga puna dhe detyra e punës, me pagesë, për periudhën kohore prej (3) muaj.”
Vendimi për pezullimin e Idrizit ishte marrë me dt 07.06.2019 një ditë pasi ai e denoncoi Ministrin Bytyqi.
Front Online, nga burimet brenda Ministrisë ka mësuar se Idrizi do të kthehet në punë të premten pasi që veç bëhen tre muaj që është pezulluar dhe ligjërisht ai duhet të kthehet në punë.
Portali Front Online ka provuar të marr një përgjigje nga Idrizi por kontakti me të ka qenë i pamundur.
E arsyeja pse erdhi deri te konflikti në mes të ministrit dhe zyrtarit të MASHT është një opinion ligjor të cilin e kishte kërkuar Agjencia e Akreditimit nga MASHT-i.
Idrizi për disa media pati deklaruar se “Opinionin nuk e kishte shkruar zyra e tij por ja kishin dërguar nga kabineti i ministrit vetëm që ta nënshkruante. Sipas tij, meqë juristët e zyrës së tij e kanë vërejtur se dokumenti nuk është i bazuar në ligj është dashur ta ndryshojnë e kjo nuk i kishte pëlqyer ministrit”.
