Pas pauzës për shkak të pandemisë së koronavirusit, në Gjykatën Themelore të Prishtinës ka vazhduar shyqrtimi kryesor në rastin e Nenad Arsiqit nga Çagllavica, të akuzuar për krime lufte në Kosovë. Avokati i të akuzuarit, Dejan A. Vasiq në njëç deklaratë përmes telefonit për RTV Kim (në gjuhën serbe) ka bërë të ditur se janë marrë në pyetje dëshmitarët anëtarë të familjes Shala, ndërsa dëshmitarët e mbrojtjes do të merren në pyetje më 1 tetor, transmeton Koha.net.
Nenad Arsiq nga Çagllavica akuzohet për dyshimin se gjatë luftës në cilësinë e pjesëtarit të policisë së RFJ (Republikës Federative të Jugosllavisë) ka rrahur dhe plaçkitur Jakup e Skender Shalën, e po ashtu edhe i ka poshtëruar duke i detyruar të këndonin këngë patriotike serbe.
“Gjatë shqyrtimit të sotshëm janë marrë në pyetje dy anëtarë të familjes Shala, të cilët dje dhanë deklaratat e tyre në pjesën e paradites së gjykimit. Në pjesën e dytë, Gjykata vendosi mbi propozimet për marrjen në pyetje të dëshmitarëve të mbrojtjes. Gjykata miratoi pjesërisht propozimet e mbrojtjes, kështu që në fillim të tetorit do të dëshmojnë dy dëshmitarë dhe t’i ofrojnë Nenadit alibi se ai fare nuk ka qenë në Kosovë në kohën kur ka ndodhur ngjarja”, ka thënë avokati i të akuzuarit, Dejan A.Vasiq.
Avokati Vasiq, sipas Radio Kim, ka thënë se gjykatësi ka refuzuar propozimin e mbrojtjes që të merren në pyetje gazetarja Angjelka Qup dhe politikani Momçillo Trajkoviq, të cilët si banorë të Çagllavicës kanë njohuri për situatën, në radhë të parë për Nenad Arsiqin.
Vasiq tha se marrja në pyetje e dëshmitarëve është caktuar për datën 1 tetor, ndërsa vazhdimi i gjykimit pritet më 25 shtator, transmeton koha.net (në foto, avokati Dejan A.Vasiq)
