Rrjeti social, Twitter, e ka pezulluar llogarinë e djalit të presidentit amerikan, Donald Trump Jr, për shkak të përmbajtjes mashtruese dhe potencialisht të dëmshme.
Të njëjtin postim e ka shpërndarë edhe vetë kreu i Shtëpisë së Bardhë. Në llogarinë e tij, postimi nuk figuron më dhe është zëvendësuar me një mesazh ku thuhet “postimi nuk është më i qasshëm”. Megjithatë, duket se ai ende mund të bëjë postime të tjera, shkruan “Independent”, transmeton Gazeta Express.
Lajmin për pezullimin e llogarisë së djalit të presidentit amerikan e bëri të ditur republikani Andrew Surabian. Sipas tij, ky veprim është dëshmi që rrjeti Twitter është një kërcënim për lirinë e shprehjes dhe se kjo platformë po vazhdon të ndërhyjë haptazi në zgjedhje.
Megjithatë, ai e publikoi një pamje ku mund të lexohej arsyetimi i masës së marrë nga Twitteri, ku thuhet se llogaria është pezulluar për shkak të akuzave për keqinformim.
Trump Jr nuk do të mund të postojë në llogarinë e tij në 12 orët e ardhshme dhe as të ndjek dikë apo t’i pëlqejë postimet e të tjerëve. Përpos pezullimit të llogarisë, atij i është fshirë edhe postimi i kontestuar.
