Të mbështjella me flamuj turq dhe vula presidenciale, pakot e mbushura me pajisje mjekësore po ngarkohen në aeroplan. Këto ndihma po dërgohen në disa shtete nga Turqia për të ofruar ndihmë në luftën kundër koronavirusit.

“Ka shpresë pas dëshpërimit dhe shumë dritë pas errësirës”, është shkruar në një mesazh që është vendosur në secilën pako. Kjo është thënie e poetit të shekullit të trembëdhjetë, Jalaluddin Rumi.

Me marrëdhëniet e dëmtuara me aleatët e NATO-s në Evropë dhe me Shtetet e Bashkuara për shkak të mosmarrëveshjes rreth sistemit mbrojtës rus, të drejtave të njeriut dhe sanksioneve perëndimore ndaj Iranit, Turqia po shpreson se kriza e virusit është një mundësi për t’i zbutur tensionet e fundit.

Pavarësisht se po përballet me njërën prej shifrave më të mëdha në botë të të infektuarve me Covid-19, Turqia ka dërguar ndihma mjekësore në 61 shtete, përfshirë Shtetet e Bashkuara, Spanjën, Italinë, Francën dhe Britaninë e Madhe.

Sipas llogaritjeve të veta, Ankaraja ka qenë ofruesja e tretë në botë e ndihmave gjatë pandemisë, duke dërguar maska, rroba mbrojtëse, teste, dezinfektues dhe respiratorë në pjesë të ndryshme të botës, shkruan “Reuters”, transmeton Gazeta Express.

Në një letër për presidentin amerikan, Donald Trump, homologu i tij turk, Erdogan, kishte shkruar se shpreson që shpirti i solidaritetit që Turqia e ka treguar do t’i ndihmojë politikanët amerikanë që ta kuptojnë më mirë rëndësinë strategjike të marrëdhënieve mes dy vendeve.

Turqia është vend kandidat për anëtarësim në Bashkimin Evropian, por procesi ka ngecur qe një kohë të gjatë për shkak të situatës me të drejtat e njeriut, trajtimit të refugjatëve sirianë dhe nxjerrjes së gazit në ujërat afër Qipros.