Miliona amerikanë që kanë mbetur pa punë nga e shtuna do të mbesin edhe pa beneficionet që shteti ia ka ofruar kësaj kategorie deri më tani. Kjo po ndodh për shkak se presidenti Trump ka refuzuar që ta nënshkruaj pakon ndihmëse prej 2.3 trilionë dollarësh, duke thënë se ajo nuk majfton për t’u dalë në ndihmë njerëzve.

Trumpi i habiti politikanët demokratë e republikanë këtë javë, kur tha se nuk është i kënaqur me pakon e madhe, e cila ofron 892 miliardë dollarë për rimëkëmbje nga pandemia, përfshirë beneficionet për personat pa vend pune, dhe 1.4 trilion dollarë për shpenzime normale të qeverisë.

Pa nënshkrimin e Trumpit, rreth 14 milionë njerëz mund t’i humbin beneficionet, sipas të dhënave të Departamentit të Punës. Për më tepër, mbyllja e pjesshme e qeverisë do të fillojë nga e marta, nëse Kongresi nuk arrin marrëveshje për financim të qeverisë para kësaj dite.

Pas disa muajve me mospajtime mes vete, Republikanët dhe Demokratët fundjavën e kaluar u morën vesh për miratimin e pakos së rimëkëmbjes, e cila u përkrah edhe nga Shtëpia e Bardhë. Vetë presidenti Trump nuk pati ndonjë ankesë për këtë pako para se ajo të votohej në Kongres të hënën në mbrëmje.

Sidoqoftë, prej asaj dite, presidenti në largim është ankuar se pakoja ofron shumë të holla për interesa të veçanta, projekte kulturore dhe ndihmë të jashtme, ndërsa ndihma prej 600 dollarësh për amerikanët në vështirë është shumë e ulët, duke kërkuar që kjo shumë të rritet në 2.000 dollarë, shkruan Reuters, transmeton Gazeta Express.

“Pse nuk do të donin politikanët që t’ua japin njerëzve nga 2.000 dollarë e jo nga 600? Dhurojani njerëzve tanë paratë”, shkroi miliarderi amerikan në Twitter.