Presidenti i Shteteve të Bashkuara, Donald Trump, tha se çfarëdo sulmi i Iranit do të shkaktonte kundërpërgjigje një mijë herë më të fuqishme pas raportimeve se Irani është duke e planifikuar vrasjen e një diplomati amerikan si hakmarrje për vrasjen e gjeneralit Qasem Soleimani.
“Cilido sulm nga Irani, në çfarëdo forme, kundër Shteteve të Bashkuara do të shkaktojë sulm ndaj Iranit që do të jetë 1,000 herë më i madh në shkallë”, shkroi kreu i Shtëpisë së Bardhë në Twitter.
Deklarata e tij erdhi pasi gazeta Politico raportoi rreth dyshimeve për planifikim të vrasjes së Lana Marksit, që është mike e presidentit amerikan dhe ambasadore e Shteteve të Bashkuara në Afrikën Jugore.
Sipas gazetës Politico, raportet e inteligjencës amerikane thonë se qeveria iraniane është duke e shqyrtuar vrasjen e diplomates Marks. Shkrimi citon një zyrtar të paidentifikuar të qeverisë amerikane.
Ky burim ka thënë se Ambasada e Iranit në Pretoria është e përfshirë në këtë komplot dhe diplomatja është njoftuar për rrezikun që i kanoset, shkruan Free Europe, transmeton Gazeta Express.
Gjenerali i lartë iranian, Qasem Soleimani, u vra përmes një sulmi me dron afër Aeroportit të Bagdadit në Irak. Shtetet e Bashkuara e kishin akuzuar atë më parë për planifikim të shumë sulmeve kundër forcave amerikane.
According to press reports, Iran may be planning an assassination, or other attack, against the United States in retaliation for the killing of terrorist leader Soleimani, which was carried out for his planning a future attack, murdering U.S. Troops, and the death & suffering…
— Donald J. Trump (@realDonaldTrump) September 15, 2020
