Mehmet Zenka nga koalicioni “Bashkë nji za”, që garon në zgjedhjet e përgjithshme në Mal të Zi të dielën e 30 gushtit, është dekoruar të premten me “Urdhrin e Pavarësisë” nga presidenti i Kosovës Hashim Thaçi, pak ditë pasi ky deklaroi publikisht përkrahjen për një listë tjetër të partive shqiptare në zgjedhjet në vendin fqinj.
“Këtë të diel, shqiptarët në Mal të Zi gjenden përballë mundësisë së zgjedhjes së përfaqësuesve të tyre në institucionet shtetërore të shtetit mik të Kosovës. Komuniteti shqiptar në Mal të Zi ka qenë gjithmonë faktor stabiliteti dhe ka luajtur rol konstruktiv e kontributdhënës në rrugën e integrimit euroatlantik të tij. Prandaj, duke njohur punën e tyre të vyer në të mirë të interesave kombëtare, edhe sot u bëj thirrje të gjithë bashkëkombësve tanë në Mal të Zi që të dalin masivisht në zgjedhje për ta mbështetur Listën Shqiptare, në mënyrë që ta avancojnë përfaqësimin e tyre politik dhe ta sigurojnë ecjen përpara të Malit të Zi drejt së ardhmes euroatlantike, si pjesë e NATO-s dhe Bashkimit Evropian. Lista Shqiptare është zgjedhja e duhur për ta vazhduar punën në të mirë të shqiptarëve dhe në drejtim të anëtarësimit të Malit të Zi në Bashkimin Evropian. Çdo kontribut i dhënë për avancimin e agjendës evropiane të Malit të Zi e çon përpara bashkimin e të gjithë shqiptarëve në familjen e madhe evropiane”, kishte shkruar Thaçi në postimin e 27 gushtit në përkrahje të Listës Shqiptare në Mal të Zi, vetëm një ditë para se të ndante dekoratën për anëtarin e listës tjetër “Bashkë nji za”.
Ndarjen e kësaj dekorate e ka publikuar vetë Zenka, kryetar i Unionit Demokratik të Shqiptarëve. Në anën tjetër Thaçi s’ka publikuar asgjë, pavarësisht se në faqen e tij në Facebook publikohen shpesh dekoratat e dhëna nga ai.
“Bashkatdhetarë të nderuar sot pata kënaqësinë që të pranoj dekoratën ‘Urdhrin e Pavarësisë’ nga Presidenti Kosovës z. Hashim Thaçi. Nderim për mu familjen time dhe gjithë shqiptarët në Malin e Zi”, ka shkruar Zenka në përshkrim të fotografisë së dekoratës. Dekorata mban datën 28 gusht 2020.
“Urdhri i Pavarësisë” u jepet personave që kanë dhënë kontribut të lartë për pavarësinë e Kosovës.
Në përkrahje të Listës Shqiptare kanë dalë publikisht edhe krerë të tjerë institucionalë në Kosovë e Shqipëri. Madje, ditë më parë dy ministrat e Jashtëm, Meliza Haradinaj-Stublla e Kosovës dhe Gent Cakaj i Shqipërisë, përmes një deklarate të përbashkët, kërkuan nga shqiptarët në Mal të Zi të bashkohen në mbështetje të Listës Shqiptare. E në një video të shpërndarë nga Zenka të premten në mbrëmje, ai dëgjohet teksa kritikon kryeministrin shqiptar, Edi Rama, dhe ministrin Cakaj për përkrahjen publike ndaj Listës Shqiptare, ndërsa në kritikë nuk përmend edhe Thaçin që dy ditë më parë kishte bërë të njëjtën gjë si dy liderët tjerë shqiptarë.
Shqiptarët në Mal të Zi në zgjedhjet e së dielës do të garojnë në dy lista. Lista Shqiptare “Koha është tani” përbëhet nga Forumi Shqiptar ( ASH-LDSH), Forca e re Demokratike, Lëvizja Perspektiva dhe Unioni i Tuzit, ndërsa Koaliconi “Bashkë nji za”, përbëhet nga Unioni Demokratik i Shqiptarëve, Partia Demokratike, Lidhja Demokratike në Mal të Zi dhe PQSHI.
