Presidenti i vendit Hashim Thaçi ka bërë homazhe pranë shtatores së heroit Zahir Pajaziti, në ditën e 21 vjetorit të Çlirimit të Prishtinës dhe në ditën e largimit të forcave serbe nga Kosova, 21 vite më parë, raporton Front Online.

Nga aty ai i`u kundërpërgjigj kryeministrit Avdullah Hotit për udhëheqjen e dialogut. Presidenti Thaçi tha se dialogun do ta udhëheqin përfaqësuesit legjitim të Kosovës.

“Do ta udhëheqin përfaqësuesit legjitim të Kosovës. Ne nuk jemi në garë , por do ta plotësojmë njëri-tjetrin. Ne edhe të bashkuar do të përballemi me pengesa të vazhdueshme prandaj do të ketë përkushtim të përbashkët dhe rezultate të përbashkëta”, ka thënë presidenti.

Kështu ai potencoi edhe njëherë që është detyrë e tij kushtetuese që ta përfaqësojë Kosovën në politikën e jashtme.

“Presidenti i vendit e përfaqëson politikën e brendshme dhe të jashtme të vendit dhe kjo është e përcaktuar edhe me Kushtetutë. Në këtë drejtim ne do ta plotësojmë njëri-tjetrin dhe do t`i tejkalojmë pengesat”, ka thënë tutje Thaçi.

Në ndërkohë kryeministri Hoti, dje gjatë prezantimit të Platformës për Dialogun, konfirmoi që dialogun do ta udhëheq vet ai. /Front Online