Agjencia kundër Korrupsionit e ka shqyrtuar rastin e ministrit Blerimi Kuçi ku dyshohej se mund të kishte patur konflikt interesi në dhënien e një tenderi për kompaninë ku ai ka aksione.
Bëhet fjalë për një tender 4.9 milionë eurosh për ndërtimin e Objektit Spitalor për nënën dhe fëmijën në Prizren të cilin, kompania “Hidroterm”, pronë e ministrit të Ekonomisë dhe Ambientit e kishte fituar.
Për të i pari kishte raportuar portali, Front Online.
Ministri Kuçi merr kontratën 5 milionë euro nga shteti i Kosovës (Dokumente)
Vendimi i publikuar me 24 dhjetor të vitit të kaluar thotë se nuk ka prova që argumentojnë dyshimin e arsyeshëm për ekzistimin e situatës së mundshme të konfliktit të interesit në ushtrimin e funksionit publik.
Pas këtij vendimi, ka ardhur edhe reagimi i ministrit Kuçi.
Njoftimi i tij:
“Të nderuar qytetarë,
Më lejoni të ndaj me ju vendimin e Agjencionit kundër Korrupsion në rastin e shqyrtuar nëse ka pasur konflikt interesi mes pozitës sime si ministër i Ekonomisë dhe Ambietit, me tenderin e fituar nga kompania “Hidroterm” në ndërtimin e spitalit “Nëna dhe Fëmija”.
Në vendimin e AKK-së, të lëshuar më 24 dhjetor 2020, është vendosur që rasti është mbyllur për shkak se nuk ka prova që argumentojnë dyshimin e arsyeshëm për ekzistimin e situatës së mundshme të konfliktit të interesit në ushtrimin e funksionit publik” shkruan Kuqi në reagim.