Paralajmërimi për një taksë prej 10 eurosh për të hyrë në Prishtinë ka ngjallur reagime të shumta.
Madje ideja për vendosjen e kësaj takse ka qenë edhe objekt humori në dy ditët e fundit në rrjetet sociale.
Kryetari i Prishtinës, Shpend Ahmeti, është kritikuar nga oponentët politikë, por edhe nga qytetarët e shoqëria civile.
Por, ka edhe të atillë që e kanë përkrahur idenë e të parit të komunës.
Dikush këtë vendim e konsideron si jo të drejtë, për shkak të kushteve ekonomike që kanë qytetarët.
“Ky është gabim i madh, nuk kanë njerëzit të japin, kjo është e tepërt”, thotë një qytetar.
“Mirë more, mirë ia bën. Po çfarë mirimore, ku me i marrë paret populli”, u shpreh RamadanKiqina.
Njëjtë mendojnë edhe taksistët. Madje ata thonë se populli duhet të protestoj kundër këtij vendimi që sipas tyre është i panevojshëm.
“Vendimi aspak nuk është i mirë, për arsye se dihen kushtet, rrethanat dhe është e pamundshme”, ka thënë Ilmi Hoxha.
“Është e panevojshme, e dyta e bëjnë në Prishtinë me hy me pagesë, atëherë po dalim edhe ne në Podujevë, po e bllokojmë rrugën dhe nuk e lejojmë transportin për Prishtinë të hyjë. Kjo është shumë e thjeshtë. Të çohet populli në këmbë, të bëhet luftë civile”, thotë Isa Rushiti.
“Kurrqysh hiç nuk është e arsyeshme të bëjë kështu”, tha një tjetër qytetar.
Dikush tjetër është i habitur me këtë vendim.
E ka edhe nga ata të cilët ia kujtojnë kryetarit të Prishtinës se nuk janë duke udhëtuar jashtë shtetit të Kosovës që të paguajnë taksë.
“Keq, nuk e di a ka ma keq diku,unë nuk kam dëgjuar që duhet me hy në ndonjë qytet dhe të paguajmë”, u shpreh një qytetar.
“Nuk po shkojmë tjetër shtet diku, vendim jo i mirë”, u shpreh ai.
Por, ka edhe nga ata të cilët e konsiderojnë si të drejtë këtë vendim, krejt kjo që sipas tyre pasi komunikacioni në kryeqytet është i ngarkuar.
“Sa i përket kolonës, do të ishte mirë” , tha një qytetar tjetër.
“Për shkak të kolonës, shumë njerëz që vijnë shëtitën vetëm për qejf, për këtë arsye e bëjnë”, ka thënë Luan Pacolli.
Por për disa të tjerë, çmimi prej 10 euro është i lartë, e ka të tillë që mendojnë se ky vendimështë pengesë për qytetarët dhe i arsyeton ata se kanë nevojë për lëvizje.
“Nuk është e drejtë kjo, dhe për çmimin që e thanë deri në 10 euro , më duket që është shumë’’,ka thënë ai
“Nuk bën, shumë vendim i keq është. Janë kushtet pandemike, njerëzit duhet të qarkullojnë, duhet me ecë”, u shpreh një qytetar./Front Online/
