Ministri i Mbrojtjes, Anton Quni priti sot në takim ministren e Punëve të Jashtme dhe Diasporës, Melisa Haradinaj, ndërsa biseduan rreth harmonizimit të statusit të atasheve ushtarakë të FSK-së në ambasadat e Kosovës si dhe përfaqësimin e Kosovës në NATO, në nivel të ambasadorëve.
Ministri Quni, me këtë rast e njoftoi ministren Haradinaj, me zhvillimet e deritashme të Ministrisë së Mbrojtjes dhe Forcës së Sigurisë të Kosovës, si dhe me objektivat për të ardhmen.
“…Jemi në rrethana të reja dhe na imponohen edhe aktivitet të reja të cilat kërkojnë një koordinim dhe bashkëpunim në mes të dy ministrive tona, për të arritur objektivat me interes shtetëror…Objektiv shumë i rëndësishëm për vendin tonë dhe për dy ministritë tona është edhe angazhimi dhe aktivitetet për integrim në NATO, për çka kërkohet bashkëpunim dhe koordinim për një qasje më efektive”, tha ai.
Po ashtu, gjatë takimit në mes dy ministrave u bisedua edhe për angazhimin e FSK-së, në misione paqësore jashtë vendit, ku kërkohet bashkëpunimi dhe koordinimi edhe me Ministrinë e Jashtme, që kushtëzohet përmes nënshkrimit të marrëveshjeve të bashkëpunimit dypalësh me shtetet përkatëse.
Në njoftim bëhet e ditur se është diskutuar rreth harmonizimit të statusit të atasheve ushtarakë të FSK-së në ambasadat e Kosovës.
Ndërkaq, ministrja Haradinaj, u shpreh se prioritet i lartë i Ministrisë së Punëve të Jashtme është integrimi në NATO, dhe për këtë ne duhet të koordinojnë veprimet, duke shtuar se në këtë drejtim janë të interesuar të rrisin përfaqësimin e Kosovës në NATO, në nivel të ambasadorëve.
“Për çështjet e shtruara, ne jemi të hapur për çdo bashkëpunim dhe sidomos për angazhimin e FSK-së, në misione paqësore jashtë vendit për çka kërkohet një punë e vazhdueshme koordinuese”, tha ajo.
