Sot e nesër nxehtë, nga e mërkura reshje shiu e shkarkime rrufesh

Instituti Hidrometeorologjik i Kosovës ka bërë të ditur se masat e ngrohta të ajrit të ardhura ditë më parë nga Afrika, do të mbesin të qëndrueshme edhe gjatë dy ditëve të para të javës së ardhshme, duke mundësuar mot me diell dhe relativisht të qetë.

IHK njofton se nga e mërkura, paraqiten kushte tjera meteorologjike dhe kjo si rrjedhojë e masave të ajrit me origjinë nga veriu i kontinentit të cilat me vete bartin edhe sasi të mëdha të lagështisë.

I gjithë ky proces rezulton me vranësira të dendura, reshje shiu dhe shkarkime rrufesh. Reshjet parashihen të shoqërohen me stuhi lokale dhe në territore të kufizuara, ekzistojnë kushte për reshje breshëri.

Temperaturat minimale do të lëvizin ndërmjet 13-17 gradë Celsius, ndërsa maksimalet e ditës parashihen të lëvizin ndërmjet 24-35 gradë Celsius.

Do të fryjë erë nga juglindja dhe më pas nga verilindja me shpejtësi 1-18m/s.