Skender Krasniqi nga Oda e Afarizmit të Kosovës ka thënë se masat e marra nga Qeveria e Kosovës janë kundër qytetarëve dhe bizneseve.Ai duke paralajmëruar largim të shumë punëtorëve nga puna kërkoi nga ekzekutivi që t’i kompensojnë ata sektorë të biznesit që ia kanë kufizuar apo ndaluar punën.“Ne jemi në takim me bizneset dhe gjendja është shumë e rëndë. Pas takimeve që kemi pasë ne si Odë kemi kundërshtuar masat duke marrë parasysh problemet që kemi edhe si rezultat i COVID-19, por edhe për shkak të paaftësisë së Qeverisë për masat e ndërmarra”.

“Për një pjesë të madhe të punëtorëve që largohen nga puna Qeveria duhet të ofrojë mbështetje për atë kohë sa janë të papunë. Ne kemi probleme edhe me Ligjin për Rimëkëmbje që s’po merren parasysh kërkesat e bizneseve edhe pas diskutimeve që kemi pasë me institucionet nuk po shqyrtohen kërkesat tona. Shteti po hesht ndaj gjendjes së rëndë të bizneseve”.
Krasniqi në Info Magazine tha se Kosova po merr masa për kufizime njësoj sikur vendet tjera të rajonit dhe BE-së, por nuk po vepron njëjtë edhe me vendimet tjera për kompensime.“Nëse në vende tjera kufizohet ose ndalohet puna e një sektori atëherë shteti i përkrah ata sektorë/ Tek ne s’e bëjnë këtë dhe s’kemi përkrahje as për të papunët, as për ata që mbesin pa punë këtë kohë”.

“Gjatë gjithë kësaj kohe të pandemisë të gjitha shtetet kanë ndërruar ligje qoftë me përkrahje të prodhimit vendor, qoftë duke i liruar nga TVSH-ja. Asnjë vendim s’u marrë nga Qeveria jonë për t’u përkrahur mjaftueshëm bizneset. Ne duhet të veprojmë në përputhje me situatën. Me këtë vendim 70 për qind e Kosovës është në të kuqen, pra të gjitha qytetet kryesore janë në zonën e kuqe”.Krasniqi tha se ekziston edhe një problem më i madh për shëndetin e të papunëve.“Si do të shërohet një i papunë që preket nga COVID-19 kur as mjekësia shtetërore si jep medikamente të mjaftueshme? Nëse nuk është i punësuar dhe shteti nuk i jep mjete për shërim është më i rrezikuar kur të është i papunë. Është gjendje e tmerrshme e punësimit në Kosovë. Sa është shkalla e përkrahjes së punëtorëve të papunë, ose ata që janë të sëmurë? Në të gjitha aspektet jeni tmerr edhe merrni shembull Gjermaninë. Por kur shteti gjerman e çon dikë në shtëpi ia sigurojnë edhe mjetet”.