×
  • Lajme
  • Lajme

    Shumica e komunave janë përballur me buxhet të kufizuar e mungesë të maskave, dorëzave dhe dezinfektuesve

    FrontOnline
    09 Korrik 2020

    Asociacioni i Komunave të Kosovës (AKK) publikoi studimin mbi “Nevojat emergjente dhe ndikimin socio-ekonomik të COVID-19 në pushtetin lokal në Kosovë”, ndërsa një ndër gjetjet është se buxheti i kufizuar dhe mungesa e masave mbrojtëse siç janë maskat për fytyrë, dorëzat dhe dezinfektuesit e duarve ishin vështirësitë kryesore me të cilat u ballafaquan shumica e komunave që nga përhapja e pandemisë COVID-19.

    Vështirësi tjera përfshijnë mungesën e personelit mjekësor, teknologjinë për realizimin e mësimit online, ndalimin e zhvillimit të aktiviteteve të caktuara ekonomike, etj.

    Ky studim është bërë gjatë periudhës maj-korrik 2020. Intervistat kanë përfshirë si kryetarët po ashtu dhe drejtorët komunalë, grupet e fokusuar të diskutimeve u mbajtën vetëm me drejtorët komunalë. Studimi përfshiu 34 komunat e Kosovës, anëtare të AKK-së.

    Të gjeturat kryesore të studimit:

    Buxheti i kufizuar dhe mungesa e masave mbrojtëse siç janë maskat për fytyrë, dorëzat dhe dezinfektuesit e duarve, u përmendën si vështirësitë kryesore me të cilat u ballafaquan shumica e komunave që nga përhapja e pandemisë COVID-19. Vështirësi të tjera përfshinin mungesën e personelit mjekësor, teknologjinë për realizimin e mësimit online, ndalimin e zhvillimit të aktiviteteve të caktuara ekonomike, etj.

    Shumica e përfaqësuesve të komunave (57%) deklaruan se ishin të përgatitur deri në një masë për ballafaqimin e një situate të tillë pandemike.

    Në përgjithësi, masat e marra nga drejtoritë komunale për të menaxhuar situatën e krijuar nga pandemia COVID-19 përfshinin dezinfektimin e objekteve komunale dhe hapësirave publike, pajisjen e personelit me masa mbrojtëse, uljen e numrit të stafit dhe punën me rotacion. Gjithashtu, në të gjitha komunat u krijua Shtabi Lokal Emergjent.

    Masat e tjera të marra nga drejtoritë specifike ishin rialokimi i buxhetit, hartimi i pakos së rimëkëmbjes ekonomike, ofrimi i informacionit mbi vendimet e Qeverisë për bizneset dhe komunitetin lokal, shpërndarja e pakove ushqimore dhe higjienës për familjet në nevojë, etj.

    Shumica e përfaqësuesve të komunave (71%) deklaruan se kishin bashkëpunuar me të gjitha ministritë e linjës / institucionet e nivelit qendror gjatë përhapjes së pandemisë Covid-19 dhe 55% e tyre ishin “shumë / disi të kënaqur” me këtë bashkëpunim.

    Më shumë se gjysma e drejtorëve komunalë (57%) në këtë studim kanë bashkëpunuar me AKK-në, ndërsa shumica e tyre (82%) ishin “disi / shumë të kënaqur” me këtë bashkëpunim. Bashkëpunimi midis kryetarëve të komunave dhe AKK-së ishte edhe më i lartë (66%).

    Nevojat emergjente ndryshuan sipas specifikave të drejtorive komunale. Sidoqoftë, dy nevoja të përbashkëta emergjente për shumicën e drejtorive komunale ishin nevoja për dizajnimin e pakos së rimëkëmbjes ekonomike dhe ndarjen e fondit emergjent.

    Nevojat e tjera emergjente përfshinin: mungesën e personelit shëndetësor, mungesën e mjeteve teknologjike për realizimin e mësimit nga distanca, udhëzimet e sakta për dezinfektimin e hapësirave publike, rrugëve dhe zonave urbane, etj.

    Sigurimi i masave mbrojtëse, fondet mbështetëse dhe subvencionet për biznese të ndryshme u përmendën si masa që mund të merren gjithashtu nga organizatat e donatorëve, institucionet huadhënëse dhe shoqatat e ndryshme, të cilat do të ndihmonin në menaxhimin dhe tejkalimin e situatës aktuale në komuna.

    Së fundmi, sipas shumicës së drejtorëve komunalë (70%), zyrtarët e tyre kanë nevojë për ndërtim të kapaciteteve / trajnime për tema të ndryshme si menaxhimi i situatave emergjente, siç ishte pandemia COVID-19, planifikimi i buxhetit në situata emergjente, trajnimi për realizimin e shërbimeve online dhe trajnimi i prokurimit, në të cilat shumica e tyre (78%) preferuan të merrnin pjesë përmes pjesëmarrjes fizike, krahasuar me pjesëmarrjen përmes platformave online. 

    Vizitë në KEDS nga Avokati i Popullit Naim Qelaj dhe përfaqësueset e UN Women Kosovo
    Nga Rubrika
    Lajme28 Shkurt 2024
    Kryetari i Kuvendit të Republikës së Kosovës, Glauk Konjufca, ka pritur sot në takim anëtarët e Komisionit të Mbrojtjes të Bundestagut gjerman,...
    Lajme28 Shkurt 2024
    Prej sot, të gjithë dëgjuesit e Radio “Romano Avazo”, me programacionin e radios mund të informohen dhe argëtohen nga kudo që ndodhen...
    Lajme28 Shkurt 2024
    Presidentja e Republikës së Kosovës, Vjosa Osmani ka përkujtuar masakrën në Likoshan dhe Qirez të Drenicës. Osmani theksoi se kjo ditë tragjike...
    Të tjera
    Lajme28 Shkurt 2024
    Presidentja e Kosovës, Vjosa Osmani është pritur në Tiranë nga kryeministri i Shqipërisë, Edi Rama dhe presidenti i Ukrainës, Volodymyr Zelensky. Osmani...
    Bota/Rajoni28 Shkurt 2024
    Një çantë që përmbante një kompjuter dhe dy memorie USB të cilat kishin planet e sigurisë së policisë për Lojërat Olimpike të...
    Bota/Rajoni28 Shkurt 2024
    Presidenti i Ukrainës, Volodymyr Zelensky, ka nderuar kryeministrin shqiptar, Edi Rama, me Urdhrin më të lartë të Ukrainës, Urdhrin e Princit “Jaroslav...
    Sport28 Shkurt 2024
    Sulmuesi norvegjez, Erling Haaland bëri histori për Manchester Cityn të martën mbrëma pasi shënoi pesë gola kundër Luton Town. Haaland dha një...
    Bota/Rajoni28 Shkurt 2024
    Numri i të porsalindurve në Korenë e Jugut  në vitin 2023 ishte më i ulëti që nga fillimi i mbledhjes së statistikave...
    Lajme28 Shkurt 2024
    Për shkak të mungesës se deputetes Fitore Pacolli-Dalipi, është shtyrë seanca e së mërkurës në Gjykatën Themelore në Prishtinë, në rastin ku...

    FrontOnline, © 2024 Të gjitha të drejtat e rezervuara.