Ambasadori i SHBA-së në Serbi, Anthony Godfrey, ka thënë se politika e vendit të tij ndaj shteteve të Ballkanit perëndimor gjatë pandemisë nuk ka ndryshuar dhe se për Washingtonin është me rëndësi rikthimi në dialog mes Kosovës dhe Serbisë.

“Politika jonë ndaj Ballkanit Perëndimor nuk ka ndryshuar. Kolegët e mi në Washington nuk janë të kënaqur me humbjen e përparimit që mund të ishte bërë, por unë mendoj se mund ta kompensojmë atë”, tha Godfrey për mediumin serb N1.

Ai shtoi se është vështirë të parashihet se kur do të zgjidhet “problemi i Kosovës” sepse po pritet formimi i qeverisë së re atje “në mënyrë që të vazhdojë dialogu” , transmeton Zeri.info.

Ambasadori tha se është optimist rreth dialogut Kosovë-Serbi, duke shtuar se i dërguari special i SHBA-së, Richard Grenell, është në kontakt të vazhdueshëm me liderët e të dy vendeve.

Kryediplomati amerikan në Beograd ka përmendur edhe ndihmën që Serbia ia ka dhënë Kosovës në luftën kundër koronavirusit, duke potencuar se duhet vazhduar këtë momentum.

Duke i komentuar masat kufizuese të Qeverisë së Serbisë për parandalimin e përhapjes së koronavirusit, Godfrey tha se “pandemia është sfidë e madhe dhe se secili vend ka qasjen e vet, por Serbia ka bërë punë të mirë”.

“Është situatë krejtësisht e re, do të doja të falënderoja Qeverinë e Serbisë dhe masat e ndërmarra në luftën kundër virusit, mendoj se kanë bërë punë të mirë. Ka kritika për qasjen e qeverisë, disa mendojnë se masat kanë shkuar shumë larg. Unë s’do ta kritikoja qeverinë”, tha ambasadori.

Megjithatë, ai tha po ashtu se ndan brengat e Bashkimit Evropian dhe të të tjerëve për lirinë e mediave në Serbi.

“Ndajmë brengat e BE-së dhe monitoruesve tjerë për statusin e lirisë së mediave në Serbi, por kjo s’ka të bëjë në mënyrë specifike me koronavirusin”, theksoi ambasadori për N1.